Słówiańskij łodyseji na Bojkoblogu cióng dalszy?

Dzisioj przipómnymy sie Bolka i Lolka - bo wto wjy, czy te dwa małe gizdy z bojki niy przebiły już pod wzglyndym popularności dwóch inkszych wielkich Słówian - śwjyntych Cyryla i Metodego.

Trocha prowokuja? Może ja, a może niy - wto wjy... Ale do rzecy!

Wydownictwo ZNAK ciepło niydowno na rynek dwie fajniste ksiónżeczki dlo małych bajtlów. Ło jednyj z nich (ino że w trocha inkszym fórmacie) pisalimy już na Wiara.pl (idzie ło "Straszne skutki oglądania telewizji"). Drugo zaś to "Podwórkowa Agencja Kosmiczna".

Coś tyn kosmos durch przi Bolku i Lolku łostatnio wyłazi. Pamjyntocie jak sie godało, że bydzie w 3D film z ich kosmicznymi przigodami? Licza, że animatory z Bielska wreszcie go skóńczóm, a póki co, mómy ZNAK-owo bojeczka na podobny tymat, ło kieryj ciut wjyncyj dowjycie sie tukej.

No i jes jeszcze ta czecio, tyż bardzo ciekawo, ksiónżkowo gra, kiero sie nazywo "MigaMi". Pierzicha, naprowdy cza być sposzczygawczym, coby na kolejnych strónach znolyź i wysznupać a to klucz, a to torta, a to zwónek, kiere ilustratory pochowały przed nami (i przed Bolkiym i Lolkim tyż), mjyndzi dziesióntkami inkszych symbolów.

Przi łokazji polecóm Wóm tyż facebookowo spółecznoś Bolka i Lolka www.facebook.com/przygodybolkailolka, a terozki przełażymy już do wyników kónkursu.

Tym razym miołek do rozlosowanio jedyn taki kómplet, w kierym bóły "Podwórkowa Agencja Kosmiczna", "Straszne skutki oglądania telewizji" i gra "MigaMi". Mieliście mi ino naszkryflać, w kierym mieście stoi pómnik Bolka i Lolka. Prawidłowo łodpowiedź to Bielsko-Bioło, a nagroda dostowo:

Urszula Urbaniak z Koszalina

Gratuluja i zarozki leca do magazynu, coby nasze chopcy z działu wysyłki roz-dwa to posłali pocztóm.