Dzisioj na Bojkoblogu trocha sztopnymy ze Słówianami.

Czymu? Bo w kioskach idzie kupić fajnistego audiobooka, na kierym niy ino mocie bojki, ale i możecie dziynki niymu pómóc chorym bajtlóm - podłopiecznym Fundacji Radia ZET. Bo widzicie, cołki przichód z tego, co sie sprzedo, pódzie na szpecjalistyczny sprzynt. Tukej mocie ło tym newsa.

Podobo mi sie tyn pómys, bo przeca ta publikacjo i dołónczóno dó nij płyta uświadómio nóm kóniecznoś niyśynio pómocy inkszym (tako jes misja tego projektu).

Włónczyły sie w niego same gwiozdy: Małgorzata Socha, Agniyszka Dygant, Paweł Delóng, Beata Pawlikowsko, Szymón Majewski, Piotr Frónczewski... To mjyndzy inkszymi łóni czytajóm tukej bojki, a te sóm z roztómajtych, ygzotycznych mjysc - choby z Filipin, Gruzji, Iraku, Ugandy, czy Madagaskaru.

Jedne z nagrań (kiere akurat czyto Socha), jest ło zaczarowanych bocianach. Jak dó mie - kwintesyncjo bojki!

Kalif Bagdadu, pałace, łogrody, pustynie, morza, magi, wezyry, torgi półne sztandów ("sztand to je po polsku kram, stoisko. Sprzedowo sie na nim bele co i idzie se tyż tam wszyjstko pomacać i łoboczyć" - tumaczóm na www.gryfnie.com).

Co Wóm byda godoł - Łorjynt pełnóm gymbóm! Nic ino siednóńć na kónia abo kamela i... A ja. Zapómniołek, żech niy jes żodyn Lawrence z Arabie, ino Pyjter z betónioka na Sublach, a siednóńć to jo sie moga co nojwyżyj na koło i zajechać na Kobiór abo Wyry :)

Ale nazot do audiobooka. Jes sam tyż na przikłod łopowieś z Togo, kieryj bohaterym jes Anansi, a łón to przeca bardzo ważno postać w roztómajtych mitach i ryligjach Afryki. To łón (pół-czowiek i pół-pajónk) mioł wyplyść pajynczyna z kieryj bóg Njame ulepił ludzi, a potym doł nóm nasióna, ale i bojki (i wszyskie inksze historie), coby my mieli ło czym fulać i co łozprowiać. Tak przinajmij wierzóm we Afryce.

Dódatkowo jes jeszcze ksiónżeczka, w kieryj bajtle mogóm malować, kómbinować, labirynty i rebusy roztómajte rozwjónzywać. A wszysko to ino za 9,99 zł.

Tóni szpas! :) A jak kupicie, to pómożecie.