Jakby go żywcym wziyli z jakij łorjyntalnyj bojki z tysiónca i jednyj nocy...

Na syrwisie www.religie.wiara.pl (kónkretnie tukej), możecie sie poczytać mojo recynzjo knigi "Borek i bogowie Słowian".

Fajnisto, pómysłowo - no downo żech takigo czegoś niy czytoł. Łod razu, jak sie jóm ino wstawi do dómowyj bibliotyczki, czowiek wjy, że jes to tako perła w kolekcji.

Już sóm punkt wyjścio mi sie w nij podobo. Synek, kiery przeniós sie w czasie, leci na przikłod na cornym kóniu boga Triglava ze Szczecina na Rugia. Ha! Dyć to jes tyn sóm motyw, kiery tak mi sie podobo w celtyckij bojce "Jamie i śpiónco ślicznotka", ino że tam bohatyr leci na kóniu do Dublina, a zamias boga eskortujóm go jakesi pierzińskie, gizdowate cwergi...

Tak sie pacza w notatki, kiere żech naszkryfloł przi czytaniu tyj knigi i naprowdy, niy wjym, co Wóm z nich sam wciepać. Dyć tyla tego jes. Musiołbych kilómetrowy wpis dzisioj zrobić, a i tak wszyskigo bych niy w nim niy doł rady zmieścić.

Tak na zachynta spómna ino Siymómysła (słowiańskigo władcy móndrego choby sóm biblijny król Salomón) abo siymargła (mitycznego stwora, kiery przeca wyglóndo jakby go żywcym wziyli z jakij łorjyntalnyj baśni z tysiónca i jednyj nocy, a tukej sie łokazuje, że i Słowiany miały swoje smoki, beboki i stworoki, ło kierych mało wto dzisioj pamjynto).

Cołkie szczyńście jes Igor D. Górewicz - chop, kiery mo charyzma, pisze z pasjóm i pjyknie pokozoł nóm słowiańsko kraina Bogów.

"Tu nie wszystko da się dokładnie zrozumieć. Tu jest jeszcze ciekawiej niż w bajkach" - godo jedna z bogiń w knidze "Borek i bogowie Słowian".

Jo tyn tytuł gorónco (gorko!) polecóm :)