Coś mie łostatnio wziyło na Słowian. Wczytuja sie w te ichniyjsze mity, sznupia za bojkami, bohatyrami - a jes tego trocha.

Cieszy mie tyż przi tym, że tyla tego w naszych kulturach łostało. 

Czasym jakigoś łobrzyndu abo folklorystycznego zwyczaju u Poloków już niy ma, ale za to łostoł sie u Czechów, Góroli, Ślónzoków, Morawioków, Słowoków, czy Ukrainców. Ciekawo sprawa...

Tak samo, jak i wzmianka ło Iwanie Groźnym, kiero wyczytoł żech w MITOLOGIACH ŚWIATA (wydoł to Olesiejuk w 2012 roku).

Piszóm tam, że tyn gizd mioł u siebie na dworze czech syndziwych niywidómych, kierzy co wiecór, przed snym, musieli mu godać bojki. No wto by sie tego pó nim spodziywoł...

Tukej znojdziecie fajny tekst ło Iwanie, kiery ukozoł sie w MAŁYM GOŚCIU NIYDZIELNYM.

A zaś sam mocie artykuł ło filmie IWAN GROŹNY. Pora lot tymu naszkryfloł nóm go do naszego portalowego cyklu ło Filmach wszech czasów, filmoznawca Mateusz Hofman. 

Psychologia władzy, łopera, ykspresjónistyczno gra ćyni... - czego tam niy ma.

Poczytejcie sie to dobrze, a jak bydziecie mieli łokazjo, łobejrzyjcie tyn film. Wszechczasiok. Znaczy sie - czeba! :)