Jak godać bajtlóm ło Bogu, Jyzusie, Piśmie Śwjyntym?

Niyjedyn sie nad tym zastanowio. Wydownictwa zaciepujóm nos roztómajtymi ksiónżeckami, kolorowankami, rymówankami...

Z poziómym tych publikacji jes różnie.Czasym, niystety, trefióm sie i takie pjyńć-fynigowe (zrobióne bele jak). Bezto ciesza sie, żech dostoł łostatnio do rynki kniga "Jezus mówi do dzieci". Wydoł to krakowski Esprit i cza sie łod razu pedzieć, że jes to wydarzynie!

Autorka tyj publikacje to Sarah Young. Kojarzycie jóm? To ta sama, co naszkryflała kniga "Jezus mówi do ciebie" (spóminali my łó nij na Wiara.pl tukej). Był to bestseller? Żeby ino. Godo sie, że to wryncz fynómyn! Dyć tyn tytuł durch sie na cołkim świecie sprzedowo, a nakład przekraczo kolejne miljóny.

Fajniście, że Young pómyslała terozki tyż ło młodszych czytelnikach. Przeca wiara bajtla (dziecka) jes inkszo, niż wiara dorosłego.

Naiwno? A kaj tam. Kolorowo, barewno, pjykno i naprowdy głymboko. To czym dorosły sie już może znudził (słyszoł to w kościele tysiónc razy), dziecko słyszy po roz pjyrszy. Dopjyro łodkrywo biblijny świot. Synsy i treści tego, co Jezus godoł, co godały proroki ze Starego Tystamyntu.

Tukej to wszysko mómy. Siła Samsóna, ciyrpliwoś Hioba, móndroś Salómóna, wóntpjynie Tómasza Apostoła... Prawie 300 strón nojważniyjszych biblijnych historii, cudnie zilustrowanych bez Carolina Farias. No dó mie to niy jes kniga - to jes bómba! Naprowdy. Jak sie jóm tak wertuja, móm wrażynie, że sie wracóm do dzieciństwa.

Niy chca nic godać, ale "Jezus mówi do dzieci" to może być nawet bojkoblogowo kniga roku. Downo żech takij rewelacyjnyj publikacje w rynce niy czimoł. Krótko godajónc: jaróm sie! :)

***

Miołek dlo Wos 3 ygzymplorze tyj knigi. Zadanie kónkursowe bóło nastympujónce: mieliście krótko naszkryflać, jako biblijno historia kojarzy Wóm sie z Waszym dzieciństwym. Kiero z nich robiła na Wos wtedy nojwjynksze wrażynie. Knigi wygrywajóm:

Marzena Fiodor z Wrocławia, Anna Bryłka z Warszawy i Jarosław Jabłoński z Konina

Gratuluja - nagrody jeszcze dziś poślymy do Wos pocztóm i za pora dni bydziecie sie mógli nimi nacieszyć :)