Trocha na to czekóm, ale i... trocha sie tego boja.

Matteo Garrone (tyn sóm co nakryńcił słynno GOMORRA), mo w tym roku w Cannes pokozać swój nowy film, kiery sie nazywo THE TALE OF TALES.

Bydzie nawet broł udział w głównym kónkursie, bezto mo szansa na prestiżowo Złoto Palma.

Czy jóm dostanie? To sie dowjymy 24 maja, jak już bydzie po festiwalu, a terozki mómy zwiastun tego filmu i pora ściepków z agyncji prasowych, z kierych wyniko, że THE TALE OF TALES jes inspirowane "Pentamerone" (zbiorym włoskich bojek), kiere w XVII wieku spisoł i napisoł Giambattista Basile.

Jak tak pacza na wciepane do zwiastuna kóncki z filmu, to sie myśla, że leko niy bydzie. Z dzieciami na to, to sie do kina przeca niy pódzie, ale wto wjy? Może akurat takie krwawe i ponure łodczytanie downych bojek i baśni łodkryje przed nami nowe synsy, kiere kaś tam w tych tekstach bóły poukrywane, posugerowane, ino my na nie niy zwracali wcześnij uwagi. Do gowy nóm niy prziszło, że w metaforyczny, zawoalowany sposób mogóm i takie wóntki kryć...

No i ta łobsada: Salma Hayek, Vincynt Cassel, John C. Reilly, Toby Jones... - choby skuli nich chca na to iś. No ja, ino kiedy to u nos poleci? Póki co daty prymiery niy podali.

***

Póniżyj wciepuja Wóm zwiastun, ale łoszczegóm - to niy jes video dlo bajtlów!