Downo żech sie niy chichroł tak, jak przi czytaniu tyj kngi. Dyć tyn synek jes niymóżliwy! :)

Kaś mi już kiedyś ta jego gymba migła, bo przeca ZNAK wydoł wcześnij dwa tómiki z przigodami Kacpra Niywypała, ale jakoś tak to wyszło, że dopiyro po tyn czeci żech siyngnół i... niy umiołek szczimać ze śmiychu. Co to za mały gupielocek! :)

Wjym, że nic niy wjym - godoł Sokrates. A co mógby pedzieć Kacper? Na bank, że wjy wszysko - chocioż tak naprowdy guzik wjy...

Ja, ta jego pewnoś siebie jes rozbrajajónco. No ale bajtle trocha takie sóm. W tych swoich małych rozumkach cosik sie ubzdurajóm i z wielkóm powagóm bydóm Wóm twierdzić, że to łóne majóm racja, a niy wy, zdrowy rozsóndek, abo jakiesi tam prawa fizyki.

Niykierym tak nawet zostowo i to samo fulajóm, jak już sóm wielkie. Posuchejcie sie na przikłod... polityków :)

Niywypał ale politycznych ambicji niy mo. Łon mo sie raczyj za detektywa. Nojwjynkszego w dziejach. Co kaj kogo trefi, to grozi mu, że skóntaktuje sie z nim jego prawnik. Jes przekónany, że dyrektor szkoły jes skorumpowany. A zaś jak na pocztówce wtoś naszkryfloł coś po hiszpańsku, to to niy sóm żodne życzynia z wakacji, ino na 100 procynt pogrożki.

To co tyn pofyrtany, mały synek godo, to jedno. Ale sóm tukej tyż śmjyszne, karykaturalne rysunki, na kierych widzymy bohatyrów w jakichś łodrealniónych, udziwniónych pozach. Mómyntami miołek wrażynie, że autor krziżuje Twin Peaks ze Suth Parkiym, bo trocha tak to wszysko sam wyglóndo :)

Tyn Niywypał mo właściwie swój własny, alternatywny świot, a zaś my mómy pierónowe szczyńście, że mogymy sie dó niego pozaglóndać. Łoderwać sie na chwila łod szaryj rzyczywistości i w czasie lektury (dosłownie!) kulać sie ze śmjychu :)

*

Miołek do Wos dwa ygzymplorze knigi "Kacper Niewypał. Total(na) porażka" ufundowane bez ZNAK. Cza było mi naszkryflać, jakie dwie inksze knigi ło jego przigodach ukozały sie w Polsce wcześnij. Szło ło "O!błędne notatki" i "Co?dziennik pomyłek". Nagrody dostowajóm:

Ewa Paszkiewicz z Łodzi i Agnieszka Mańkowska z Fabianek

Gratuluja, tómiki jeszcze dziosioj poślymy Wóm pocztóm.