Kónkretnie: tyn ich pierziński film "Jupiter: Intrónizacja".

Niy wjym czymu, ale durch za mnóm łazi. Kadry ze zwiastuna, jakiesi fotosy, plakaty...

Może bezto, że to klasyczne science-fictión? Bojki, jakich downo niy paczołek, a przeca móm do tego gatunku niy łod dzisiej syntymynt.

No to pómyślołek sie, że może cza łobejrzeć co tam w "Nowyj Fantastyce" piszóm. Co łostatnio w sci-fi trowie pisko. Bezto wczytoł żech sie we kwietniowy numer tego pisma. Coch tam znod?

Roboty, gadżety, absurdy codziynności łobecnyj i prziszłyj. Ale i na przikłod fajno nowelka Carrie Cuinn, kiero nadowo sie do tumaczynio tego, co to jes dlo Amerykónów te cołkie Halloween. U nos sie na to czynsto przezywo, ale bez jakijkolwjyk wiedzy na tyn tymat. A przeca jes to łoswojynie sie ze śmiercióm. Humorystyczne, fikcyjne pokónanie pierzińskij kostuchy, diobłów, czy inkszych dymónów.

Coś co u nos (we śrydniowieczu) było czynste. Te wszyskie śmiertki z kosami w roztómajtych wystympach wyndrownych trup tyatralnych, kiere próbowało sie podstympym wykołować. Niy jes to przipadkiym to samo?  

Praktycznie kożde łopowiadanie wydrukowane w tym numerze jes tyż łopowieścióm "barwnóm i niysamowitóm". A dyć tego my, ludzie, pragnymy łod poczóntku naszego istniynio.

Co ciekawe, w niykierych tekstach, natknymy sie tyż na poczeba Sacrum, Transcyndyncje, Boga.

A to wtoś Go szuko w laboratorium, a to mómy ekspedycjo, kiero próbuje zawyndrować do mitycznego Kunlun, a to zaś kieryś z bohatyrów rzyko do bogów Północy...

Może to jes to, co mie tak do tego filmu Wachowskich cióngnie? Te kadry, co to niyby w kósmiczno-utopijnyj scynerii sóm pokozane, ale tak naprowdy, sóm praktycznie idyntyczne z tym, co widzymy tyż w roztómajtych religiach, ich śwjóntyniach, śwjyntych łopowieściach, mitach, naszych baśniach i snach...   

Jak wiadómo z religioznawstwa abo ze psychologie: dany łobroz to niy ino to, co widzymy, bo łón przeca prziwołuje dodatkowo inkszo, wyższo rzeczywistoś.

"W tradycyjnych kulturach wszelką twórczość postrzegano jako materialne odwzorowanie rzeczywistości nadprzyrodzonej, a samych twórców uważano często za pośredników między niewidzialnym światem duchowym, a widzialnym światem zmysłów" - czytóm w VII tómie wydanyj przez PWN yncyklopedii "Religia". Ha! I co Wy na to? :)

Niby gupie science-fictión, a wiela z niego powycióngać idzie...

***

Na focie kadr z filmu "Jupiter: Intrónizacja". Sakralny, pra?