Kleksa znocie? Pamjyntocie? W sumie kómiksy łó nim idzie dostać cheba w kożdym Ympiku...

Jo łostatnio żech sie na jedyn skusił, bo z tego co pamjyntóm, to czytoł żech album łó nim... ze dwajścia pjyńć lot tymu! No ja, jak tyn czos furgo...

Wybroł żech sie tómik "Smocze jajo" - skuli tytułu, to wjycie :) Baśniowo-bojkowy wóntek musi być. I żech sie niy zawiód!

Z tytułowego jajca wykluwo sie drach, a pierón jes z niego niy z tyj ziymi. Co to je za zachciywno bestyjo. Chca, chca, chca. Wjyncyj, wjyncyj, wjyncyj.

Trocha przipómino bajtla-rozdartka, kiery terroryzuje matka i łojca swoimi żóndaniami, ale trocha tyż dorosłego, kierymu ego pizło na dekiel i myśli sie ło sobie, co łón to niy jes. Choby jaki farałón, abo milióner, co to mu sie zdo, że ino łón jes na świecie i wszysko mu sie noleży, a inkszych mo kajś. No, i tego sie w tym stworze dopaczeć mogymy.

Co jeszcze sam mómy... No przede wszyskim humor! Dyć to, co ta Szarlota Pawel sam nawynokwiała, to jes kómiksowe miszczostwo. Żeby chcieć dracha pokónać kaugumóm i marmeladkami? Tego by ani cołki Mónty Pythón niy wymyślił! :) Abo że jedna z czech smoczych gów mo syn, w kierym ratuje smóczyca pórwano bez cwergi :)

Jes tyż i tympo. A kómplikacje sóm sam takie, że mo sie wrażynie, że to niy żodno bojka, ino "Łodyseja" Hómera. Przigoda góni przigoda, za labiryntym czeko jaskinia, a z nióm jeszcze gynsto puszcza, w kieryj łolbrzim Drops znojdzie sie we sytuaci, choby z "Czerwónego Kapturka".

A tyn pustelnik Chlust? Dyć łón wyglóndo choby nosz pórtalowy Cylnik (ks. Lywandowski)! :) Takie coś, to je sama rodoś czytanio.

Nic ino pedzieć czi razy "plum" i bydzie sie mómyntalnie w Pelikanii - krainie kleksów. No abo w Ympiku, pó nastympny tóm ło przigodach Jónki, Jónka i Kleksa.