No z tym z Mediólanu. Dyć wjycie, ło co mi idzie, niy? :)

Byda musioł ło tym filmie kiedy naszkryflać we Filmach wszech czasów bo godejcie, co chcecie, ale CUD WE MEDIÓLANIE to jedyn z nojważniyjszych filmów woskigo nyoryalizmu. Ale, co ciykawe, jest to tyż bojka.

- No kaj tam bojka?! - wtoś sie może pómyśleć. Dyć nyoryalizm to sóm filmy społeczne. Ło borokach, bjydokach i problymach po wojnie. Ja, to prowda, ale widzicie, we CUDZIE WE MEDIÓLANIE Vittorio de Sica tyn gatunek (poetyka) przekroczył. I nakryńcił bojka.

Poczóntkowo mie tyn film nerowoł. Co za gupoty! Bojki! Kuriozitka, a niy film! - przezywoł żech w myślach. No bo kaj tam, jakieś mini-państewko bezdómnych mi pokozywać. Jakieś bjyda-scynografie. Slumso-chałpki na wesoło...

Ale potym takich richtich baśniowych cudów je tam coroz wjycyj i wjyncyj (anioły, duchy, magickie spyłnianie życyń). No i tyn finał! Tyn lot na mietłach do inkszego, lepszego świota.

Pómyście sie, wiela tego (symbólicznego) tam jes!

Lecóm na tych mietłach, bo sie wznoszóm. Bo muszóm. Bo czowiek musi sie wzniyś pónad tyn real, co go sam mo. Poczebuje marzynio i fantazjowanio, choby luftu.

Poczebuje fikcji (znaczy sie tyż i kina). Poczebuje religii (bez wierzyń w roztómajtych pómagierów z nieba bylibymy kaj? Durch w depresji, choby Woody Allyn).

A wszysko to pokozane za pómocóm mietły. Takij co furgo. Takij klasycznyj, łod heksy z bojki.

Wto by na to wpod, że furgajónco mietła móże być takim nośnym i bogatym symbolym, co?