Czytóm sie łostatnio biografia Judy Garland, kiero napisoł Gerald Clarke.

No niy mógło w tyj knidze braknóńć wóntku ło CZORNOKSIYNŻNIKU Z KRAINY OZ - jednym z filmów wszech czasów, w kierym Garland grała.

Tukej sie łó nim możecie poczytać na naszym portalowym syrwisie Kultura, a jo póniżyj tak trocha streszcza Wóm i ześlónszcza co Clarke szrajbnół w tym tymacie...

Choby to, że w tychnikolorze nakryńcili łopowieś bardzij sarożytno łod samego antyku. Pjyrszy mit ery kina!

Dorotka idzie po śladach inkszych herosów. Choby Łodyseusz chce sie dostać nazot do dóm, ale i bogi i ludzie ji na to niy chcóm pozwolić.

Choby sir Galahad zapuszczo sie w mroczne i ciyniste knieje, po to, coby dójś do samopoznanio. Do swoij tóżsamości.

Kożdo tako dróga to w mitologie metafora peregrynacji psychicznych, a kożdy potwór mo swó łodpowiednik w mrocznych głymbiach pódświadómości.

Clark tumaczy, że wszysko to (w czasie syansu, abo lektury) pojmujymy intuicyjnie. Koi nos to, inspiruje, przekónuje, że i my sie z roztómajtymi pierziństwami w życiu (symbólizowanymi ino bez heksy, diobły i łolbrzimy), dómy jakosi rady.

Pisze tyż, że kiedyś, żeby dany mit "wloz" (był rozpoznowalny i uruchómioł tyn pódświadómy proces kojynio, inspirowanio itd.), cza było wieków. Dziynki kinu, stykło pora lot/dekad, żeby stoł sie uniwersalnym punktym łodniesiynio, kiery wykraczo poza tóżsamoś jynzykowo i naródowo.

A Oz to niy jedyno bojka, w kieryj grała Garland. Dyć wjynkszoś produkcji z jyj udziałym to było nic inkszego jak bojki. Fikcyjne, niyrealne historie, kryncóne na łosłoda. Choby musical PIRAT z 1948 roku, abo niby-wsternowy REKORD ANNIE z 1950, w kierym na kóniec niy wystómpiła, ale pora scyn nagrała.

Kóncki z tych filmów wciepuja Wóm póniżyj: