...siódmego syna. Ino łón może pokónać zło zagrażajónce baśniowyj krainie.

Na ta bojka żech czekoł. Szczympki fabuły z łopisów, pora migniyńć w zwiastunie, a czowiek już czuje, że z czymś głymbszym łobcuje.

No ja no, ale jak pedzioł w jednym wywiadzie Jeff Bridges: "cała ta opowieść to nic innego jak mit. A mitologia zawsze wydawała mi się niezmiernie fascynująca. Przygotowując się do roli, czytałem Junga i Campbella, na planie przekazywaliśmy sobie ich książki. Mam się za bajarza, opowiadam historie, a mity nie dość, że są fascynujące, to jeszcze datują się na tak zamierzchłe czasy, że można uznać je za zakorzenione w naszych duszach" (cołki wywiad tukej).

Co to jes tyn mit? Zwyczajno bojka? Niy. Coś wjyncyj. Coś, kaj to co śwjynte, synne (łóniryczne) i psychiczne (archetypowe) sie ze sobóm łónczy. Jakysi tyjater zaświatowyj wyłobraźnie sie we mitach łodgrywo. Coś co uczy, koi, czasym niypokoi, ale ino bezto, coby nami wszczónsnóńć. Uświadómić nóm jakysi niybezpieczyństwo (że nojwiynksze heksy i diobły bieróm sie z naszych lynków i niynawiści na przikłod).

Coś, z czym muszymy sie dać rady. Skónfróntować sie, jak sóm śwjynty Jerzy ze smokiym.

I takie mityczne czónstki w tym filmie sóm. Takie, co to cza je rozszyfrować, choby to była naszo synno wizja.

Wto je kim w tyn ykranowym królestwie archetypów? Czy przipadkiym mateczka Malkin (nojwjynkszo heksa we filmie, przemjyniajónco sie w dracha), niy jes wszyskim tym, co w naszyj duszy dołujónce, niynawidzónce i przekónane ło braku synsu? Dyć łóna to symbolizuje. Persónifikuje.

Sóm i aktory, na kierych paczy sie z przijymnościóm (Julianne Moore, Ben Barnes, Alicia Vikander, spómniany Bridges). Ale czy jes to dobry film?

Ja! Jak kómuś sie podoboł "Season of the Witch" z Nicholasym Cage, to tukej może sie spodziywać filmu trocha podobnygo, chocioż bardzij spektakularnygo. No i sóm te ciykawe ylymynty, kiere kajś już my widzieli.

Bridges prziłazi po Barnesa choby Samuel po Dawida. Vikander załatwio Barnesa, jak Dalila Samsóna. Bridges medytuje choby jaki wschodni mnich, a tówarzyszóncy bohatyróm Kieł to nic inkszego jak lygyndarny, średniowieczny łodpowiednik Chewbacci z "Gwiezdnych wojyn".

Ciykawie autory pokozały tyż sojuszników mateczki Malkin. Indianer, hinduski bóg, afrykańsko szamanka... - że tyż w erze poprawności politycznyj żodyn sie jeszcze niy ciepie ło łobraza tych kultur. A może już sie kapli, że to ino fajniście wyglóndajónce na ykranie kóstiumy, a niy żodne ataki na ludziów z inkszych ras?

Żeby to tak było. I żeby w kinach mieli my wjyncyj pódobnych bojek. Richtig w mitach zakórzyniónych i zachyncajóncych do śyngniyńcio po te downe, pjykne historie, z kierych niyjedna móndroś wypływo.

***

Póniżyj mocie zwiastun. Pieróm sie w nim, choby gupieloki. Ale we filmie aż tyla tego lónio sie niy ma. Sóm za to pjykne pyjzaże, humor, wóntki rómantyczne i rodzinne. Film - ja! Zwiastun? NIY! :)