Może łod Skarbnika?

W sumie - czymu niy. Rok mómy nowy, 2015 (dwa-tysiónce-pjytnosty), ale stary dobry Skarbek, kierego chopy na kożdyj grubie znajóm, wort jes przipómniynio.

Myśla sie, że łón (no i jesce utopiec), to takie dwa richtig ślónskie lygyndarno-mityczne stworoczki, łod kierych nojczyńścij zaczyno sie fascynacja Ślónskim, jego kulturóm, łodmiynnościóm.

To patróny? Przewodniki? A może zabobóny? Pogańskie pierzyństwa, kiere cza wyplynić?

Ha! Znaloz żech nawet tako wersjo, w kieryj Skarbnik to... łojciec śwjyntyj Barbary! Pónoć zostoł ściepany pod źymia za kara. Za to, co napochoł za życio.

No to jak to w kóńcu jes? Jes łón pogański? Chrześcijański? A może - dziynki ludowości - i jedno, i drugie? :)

Fascynujónco to postać, beztóż dzisioj propónuja Wóm, cobyście sie łobejżeli jedyn program telewizyjny, w kierym ło Skarbniku sie godo. To szpecjalny łodcinek magazynu DEJ POZÓR, co regularnie leci w TVP Katowice.

Link do tego łodcinka mocie tukej

A sam dowóm drugi link - do inkszych czyńści DEJ POZÓR. Kapitalnyj tv audycji prowadzónyj przez Izolda Czmok-Nowak.

Polecóm! Widać ze ślónskóm edukacjóm regiónalnóm niy jest tak nojgorzij.

***

P.S.
Tyn łobrozek, co ilustruje ta notka to dzieło Pawła Wróbla "Górniki popijają ze Skarbnikiem i św. Barbarą".