Nojprzód Mikołoj, potym urlop - no trocha żech sie przed tymi śwjyntami dychnół.

Zawsze jak móm wolne, myśla czy niy citnóńć stónd na chwila do Pragi, ale tym razym posiedzioł żech w dóma, chocioż... Tyż niy do kóńca.

Citnół żech kaj ińdzij. Do mitycznyj, baśniowyj Skandynawie. A wszysko dziynki jednyj audioknidze, kiero żech dostoł na Mikołoja.

Idzie ło wydano bez studio Sound Tropez płyta "Zdradzóno Czarodziejka / Wyspa Wśród Lodów".

No ja, szajsnół żech sie. Jes to niy tyla audiokniga, co suchowisko. Za Thorgala godo sam na przikłod Jacek Rozynek, za Aaricia - Maria Niklińsko, Gandalfym Szalónym jes Arkadiusz Jakubik, a Slivióm - Sóńja Bohosiewicz.

Thorgal robiół u nos w pedałbudzie furora (czymu sie na szkoła podstawowo godo pedałbuda - niystety niy wjym). Wjym za to, że Thorgal, Kajko i Kokosz abo Astyrixy, to bóło coś, co dowało nóm, bajtlóm, móżliwoś łoderwanio sie (citniyńcio!) łod PRL-owskij, a potym postkómunistycznyj, szaryj rzyczywistości.

No ja, funkcja yskapistyczno - popkultura spełnio jóm niy łod dzisiej, a te akurat kómiksy pozwolały nóm uciyc na chwila do inkszych, fajniyjszych świotów.

I w sumie dalij pozwolajóm. Dzsioj już tyż we forme gier kómputerowych, suchowisk abo filmów aniymówanych.

Co do "Zdradzónyj Czarodziejki / Wyspy Mjyndzy Lodami" to musza Wóm pedzieć, że jest to wyczyn jak pieróna.

Ryalizotory fajniście nagrały to, co wymyślili Rosiński i Van Hamme. Tyla tukej nawjónzań do wjerzyń ludów Północy. Za bajtla bych tego niy pochopił, niy łodczytoł - terozki jes inaczyj. Jak sie prowadzi www.religie.wiara.pl, to czasym czeba sie wgryzać w roztómajte mity Germanów i Wikingów. Widza, że thorgalowe kómiksiorze tyż sie wgryzały i naprody ćykawie to pokozali w swoich albumach.

Jak tyż sie chcecie powgryzać to polecóm kniga Artura Szrejtera, kiero sie nazywo "Mitologia germańsko. Łopowieści ło bogach mroźnyj Północy". No ale przede wszyskim polecóm Thorgale. I te na CD i te na papiórze.

Ja. Cza bydzie zaś siyngnóńć po papiórowe Thorgale. Doilustrować sie to, co przi suchowisku widza ino łoczami wyobraźne...

Thorgal, Thorgal, Thorgal. "Kunsztowno mjyszanka science-fiction, mitologie i baśnie", jak pedzioł Róman Surżynko. Nic wjyncyj niy dodóm. No chyba że linka do fajnistego bloga ło Thorgalu. Mocie go tukej

A póniżyj kóncek suchowiska.