Przeczytoł żech sie łostatnio KINOPASSANA - nowo kniga Tómasza Raczka ło sztuce paczynio na filmy.

Zrycynzowoł żech jóm nawet na Wiara.pl (tukej), ale jak wiadómo wszyskich wóntków, kiere sóm w danyj knidze, w jednyj recynzji sie chycić niy do.

Raczek spómino tam na przikłod (przi pisaniu ło filmie AVATAR), ło teorii (idei) nadmariónety, na kiero wpod dwono, downo tymu Edward Gordón Craig.

Żywy aktor mo swoje ludzkie łograniczynia. Choby niy wjym, jak sie staroł, niy zawsze udo mu sie zagrać tak, jakby chcioł ryżyser. Ale już taki kómputerowo przeanimowany twór, jak te stworoczki z AVATARA, grajóm, jak im twórca przikozoł.

Pisza ło tym, bo jakoś tak łostatnio coroz czyńścij myśla ło KSIYŃCIU YGIPTU - biblijnyj, łoscarowyj bojce, kiero cza kóniecznie łopisać w naszym portalowym cyklu ABC filmu biblijnego.

Tam tyż tradycyjno animacjo połónczyła siły z kómputerym i powstoł wto wiy, czy niy nojlepszy film biblijny w dziejach kina.

Dzisioj jakie byście niy chcieli cuda na ykranie idzie pokozać ryalistycznie. Ja, ino czy ło to tak naprowdy idzie? Czy niy lepij pokozać je... cudownie?

Twórcóm KSIYŃCIA YGIPTU sie to fajniście udało. Plagi ygipskie, przełażynie bez morze, polóncy sie krzok, w kierym Mójżeszowi łobjawio sie Pónbócek... - wszysko to pokozali naprowdy pjyknie.

Kómp-kino XXI wieku mo swoje łograniczynia. Wklejóno póniżyj reklama z wirtualnóm Audrey Hepburn jes jeszcze trocha sztucznawo, ale prziznejcie sami: mo coroz bliżyj ryala. Wto wjy. Może niydugo na ykrany wlezóm nowe filmy z Bogartym, baraciami Marx abo Marylin Monroe?

Jako wielbiciel starego Hollywood i tamtych downych, celluloidowych bojek z kalifornijskij fabryki snów, byłbych takim e-zwrotym w historii kina zachwycóny.