Ślónski folklor to prowdziwo kopalnia (abo raczyj gruba!) łopowieści niy z tyj ziymi.

Niydowno przipómnioł żech sie cykl audycji, kiere w Radiu Katowice leciały bez wakacje. Kożdo z nich pośwjyncóno bóła inkszymu stworoczkowi, lygyndzie, zdarzyniu.

Ymitowano na antynie syria Eweliny Kosałki-Passi pómysłowo wprowadzo  w śwjot downych ślónskich wierzyń i historii. Pjyknie je przipómino i zachynco, coby kaś za inkszymi pódaniami i bojkami posznupać, pogłymbić swojo wiedza ło regiónie i ło tym, co szło by nazwać jego "duchym".

Niy byda Wóm sam streszczoł tych audycji, bo kożdo z nich idzie znalyź na strónie Radia Katowice. Styknie, jak klikniecie tukej i już je mocie.

Pjyrsze sóm SKARBY, a niżyj mocie takie mini-archiwum z resztóm łodcinków.

Puszczejcie, suchejcie i sie zafascynujcie! :)

Co tam Grimmy, Andersyn, Perrault... Na Ślónsku mómy niy gorsze bojki i historki. Ino cza sie to wreszcie uświadómić, pra? :)

***

Na focie mocie moigo dómowego utopca. Przibył dó nos z Pragi. Ino jak go nazwać?

Jak na Paprocanach króluje Paterpless, to tyn by sie może musioł nazywać Bruderprag? :)