Jak na Ślónsku jes burza i grzmi, godo sie, że to aniołki kulajóm bergi (takie wielkie kóncki wónglo). A co godajóm w Bhutanie?

Żeby sie dowiedzieć, styknie siyngnóńć po łopoublikwano przez Wydownictwo M kniga W POSZUKIWANIU GRZMIĄCEGO SMOKA, kieryj autorami sóm Sophie i Romio Shrestha. Tyn chop to malyrz thanek (buddyjskich śwjyntych zwojów) i to tukej widać.

Historia jes w miara prosto: dwa bajtle sóm ciekawe, co to tak w chmurach grzmi i bezto wuruszajóm w niysamowito podróż, w czasie kieryj zawyndrujóm mjyndzy inkszymi do buddyjskigo klasztora, abo do gniozda krzidlatyj tygrysice.

Przeczytać idzie to roz-dwa (króciótkie to jes). Gorzij, jak zaczniecie paczeć na ilustracje, bo na nie napaczeć sie niy idzie :)

Jes w nich coś takigo... łorjyntalnygo (magia, ygzotyka), że chce sie do tych plansz durch nazot wracać. Kwintesyncja bojki, baśni, mitu z tych ilustracji ymanuje. A i zachynco do posznupanio za jakimi inkszymi knigami, tekstami ło Buthanie, kulturze, historie tyj krainy... Dyć już tyn tytułowy grzmióncy smok to materiał na łosobno, rubo kniga!

Jes nawet tako lygynda, że jak wielki, tybetański śwjynty Tsangpa Gyare Yeshe Dorji kósekrowoł nowy klasztor, usłyszoł ryk grzmióncego smoka, kiery głosił wielkie prowdy buddyjskij religie. Tyn smok to był Druk (tyn sóm, kiery widnieje na fanie Buthanu). Śwjynty mnich zarozki przemianowoł nazwa klasztoru na Druk, a swojo wersjo buddyzmu nazwoł Drukpa Karguypa.

Buthan to zogłymbie ciekawych łobyczajów, religijnych zwyczajów. Takie na przikłod śwjynto tsechu, to łokazjo do religijnego tańcowanio w pjyknych, barewnych kostiumach i maskach.

Echo tego wszyskigo znojdziecie w ksiónżeczce W POSZUKIWANIU GRZMIĄCEGO SMOKA. Jo żech jes nióm zachwycóny, a i sóm Buthan coroz bardzij mie fascynuje. Cza bydzie łó nim co napisać do naszego wiarowego Alfabetu religii!

***

A kniga możecie sie kupić w naszym portalowym sklepie. Styknie kliknóńć tukej