No i mómy nastympny rok i kolejny roz łobchodzymy Dzyń Kałużyńskigo.

Tym razym poczytoł żech sie ło dzieciństwie słynnygo, polskigo krytyka. Ło jego pjyrszych syansaach, wrażyniach z kina. Ło tym, jak mu zarycoł lyw MGM, a łón, razym z inkszymi widzami, przestowoł dychać z wrażynio.

No ja, za bajtla tak to było. Tyż żech tak mioł. Terozki już niy kożdo wizyta w kinie kóńczy sie takim przeżyciym. Gorzij. Czasym film, kiery sie widziało 25 lot tymu (i mo sie go w pamjyńci, choby to był jaki cud), paczy sie terozki zaś i... tego cudu niy ma. Widzi sie niydoróbki, błyndy móntażowe, absurdy scynariusza, darymne aktorstwo...

Łostatnoio mioł żech tak z filmym PÓN KLEKS W KÓSMOSIE.

Wziyni nos na to do kina w podstawówce, a mi, w pamjyńci, łostały z tego magickie szczympki i kóncki. A jak żech to łobejrzoł łostatnio, to żech sie załómoł.

Niy było piniyndzy na dekoracje sciynce-fictión, to kryńcili to w jakichś hotelach z lot łosiymdziesióntych. Niyby nowoczesnych (wtedy), ale dzisioj sie z tego wystroju raczyj chichrómy.

Sóm sam tyż roztómajte kukiełki, kaszparki, ino że z gómbki zrobióne (Melośmiacz!). Amerykańskie muppety to to niystety niy sóm.

Jak sie tak im przipaczeć, to myśla, że twórcy inspirować mógli sie kómiksym "Podróż smokiym Diplodokiym" Baranowskigo na przikłod. Ino, że u niego to bóła psychodelia kolorów, a u tukej? Szkoda godać...

W scynariuszu jakiś tam syns widać. Jes porwanie ksiynżniczki, kiero cza wyratować, jes uwiynziynie w grze kómputerowyj, sóm wizyty kosmitów na ziymiy wieki tymu... - GWIEZDNE WOJNY, TRÓN Lisbergera i knigi Daniykyna sie kłaniajóm. Atmosfera i tymatyka lot łosiymdziesióntych tukej jes. Ino wykónanie marne i efekty szpecjalne niy sóm za szpecjalne :)

Jak chcecie, to sie to łobyjrzijcie. Jes na przikłod na vod.pl. A na kóniec jedna piosynka z tego filmu (kiery przeca jes tyż musicalym) :)