Ale mómy łostatnio szczyńście. Niy doś, że ZNAK wydoł niydowno słynno powjyść Janoscha ło Hrdloku, to jeszcze pómyśloł tyż ło bajtlach i dó nich tyż cosik mo.

Ło knidze SZCZYŃŚLIWY, WTO POZNOŁ HRDLOKA pisołek już na Wiara.pl tukej, bezóż na Bojkoblogu naszkryflóm Wóm ło publikacje MIŚ, TYGRYSEK i NOWE PRZIJOCIELE.

Pjyrszo czyńś tyj knigi to bojka ło tym, jak misiu i tygrysek ruszyli w dróga, coby trefić sie z ujkim Puszkinym.

Wyndrujóm i wandrujóm, zaliczajóm nawet Hamburg i Kolónia, a w tyj łostatnij, jak wiadómo jes wielko katedra. A w nij? Jeszcze wjynkszo tajymnica!

Fajnisto to łopowjyść. Niby dlo nojmłodszych, ale Janosch co chwila wtrónco sam roztómajte życiowe prowdy, łopisuje paradoksy i absurdy, kiere może nawet dorosły lepij zrozumi i pochopi. Choby te ło medialnych gwiozdach, ich fanach i autografach, kiere kożdy chce mieć, ino... po pieróna im to? :)

Pobawił żech sie przi czytaniu tyj knigi, w kieryj niyby idzie ło to, coby poznać szczyńście cołkigo świota. A co nim jes?

Dobrze sie pojydz i potańcuj - zdowo sie nóm godać myndrzec Janosch.

No, a ta drugo czyńś knigi, to zbiór nojpjykniyjszych łopowieści i wjyrszów ło hazokach (zajónczkach).

Dowjycie sie tukej na przikłod, że takie uszate hazoczki wcale niy sóm gupie, że borsuki sóm móndre, a ciotka Lulajla umi fajniście śpjywać.

Udane to, szykowne i barewnie zilustrowane (już ze samego łoglóndanio tyj knigi mo czowiek uciecha). No, a jeszcze sóm te spómniane wcześnij móndrości.

Czasym smutnawe, czasym absurdalnie śmjyszne. Jes nawet hazoczo (zajynczo) wersja RÓBINSÓNA CRUSOE!

Ja, ja... Czego tyn Janosch jeszcze niy wymyśli...

A to co już wymyślił, przeczytocie sie w jego knigach. ZNAK już trocha ich powydowoł - zresztóm klknijcie sie sam i łobejrzycie sami, wiela tego już na naszym rynku jes.