Jak tyn film właził na ykrany, w "Chicago Tribune" pisali łó nim, że to strata talyntów i piniyndzy. A mimo to stoł sie kultowy. Dzisioj na Bojkoblogu klasyka filmowyj baśni, czyli LABIRYNT z 1986 roku.

Wejrzijcie sie ino na to, wto za tym dziełym stoi. Jim Henson łod muppetów, George Lucas łod GWIEZDNYCDH WOJYN, Terry Jones z Mónty Pythóna i David Bowie, kierego niy ma co definiować, bo... i tak sie niy do :)

Tako to ykipa sie wziyła za film do dzieci, kiery dzisioj uważo sie za lygyndarny. No ja, ino czy do sie go terozki łoglóndać?

Zrobił żech sie niydowno taki ykspyrymynt i żech sie go puścił. Jes lygalnie na ónetowym VOD, bezto jak ino mocie chyńć, to klikejcie (tukej).

Jak na porzóndno bojka (baśń) przistało, film tym mo warstwa dosłowno i symboliczno.

Ta pjyrszo to historio spółczesnyj dziołszki (gro jóm modo Jennifer Connelly), kieryj gobliny porwały braciszka i łóna terozki musi go znalyź. No a po dródze spotyko roztómajte stworoczki, kiere ji w tym pómogajóm abo ino jóm szterujóm i ciepióm kłody pod nogi.

Ta drugo to przebogato symbolika, kiero cza rozszyfrować. A naprowdy niy cza być Freudym abo Bettelheimym, coby sie z tym dać rady.

• Same gobliny (jako rasa, masa, grupa) mogóm być naszymi złymi myślami, uczuciami. Tymi wszyskimi "hejtami" i lynkami, kiere sie w nos niystety czasym kotłujóm i niy umiymy sie z nimi dać rady. Ale już poszczególne chopecki i brzidoki, kiere bohatyrka spotyko, to co inkszego. Mo sie wrażynie, że kożdy z nich symbolizuje inkszo życiowo postawa.
   
• Jedyn (kónkretnie sir Didymus) jes narwany i trocha tak bez gowy zmago sie z pojawiajóncymi sie problymami. Łodwaga to łon mo, szwung do działanio tyż - ino co z tego, jak to takie na guptoka-gupieloka wszysko robióne.
   
• Drugi zaś (byjor Ludo) mo potyncjał - dyć to nojprowdziwszy łolbrzim! No ja, ino że łón jes zdołowany i we własne siły niy wierzy.
   
• Czeci (Hoggle) mo nawet chyńci jakoś sie złu (królowi gobblinów) postawić. Ale sie boi. Ulego mu. Zdradzo.
   
• A idzie tyż nic niy robić, udować, że problymów niy ma, citać w hedónizm i pozwolić, coby zło sie rozprzeszczyniało. I takich muppecioków spotko dorastajónco dziołszka. Ale niy dowo sie im ogupić.

Idzie dalij bez labirynt, w kierego cyntróm jes jij braciszek (kiery tyż może symbolicznie być brany za dziecko, jij prziszłe macierzyństwo, do kierego ta nastolatka naturalnóm kolejóm rzecy zmjyrzo).

Jes sam i humor, dziynki spómnianymu już Jónesowi z grupy Mónty Pythóna. Goblliny durch sie wadzóm, dwie (godajónce!) koładki do dżwi, dogodać sie niy umióm, a kożdyj z postaci grozi bagno wiecznego smrodu w Smrodlandzie (to takie dżistajónce barziny - tyż symbolizujónce coś, co grozi kożdymu, jak ino zacznie wbrew swojymu sumjyniu coś robić).

Sóm tukej tyż czarodziejskie lustra, zatrute łowoce, schymat drógi, jak z "Czornoksiynżnika z krainy Oz" i kupa inkszy rzecy, kieych Wóm niy zdradza. Zamias tego wciepna za to klip Davida Bowie prómujóncy tyn przebogaty znaczyniowo i wizualnie film. Łobejrzijcie sie go. Dobrze Wóm radza :)