Sóm takie filmy, do kierych czowiek wraco, wraco i wraco...

Jednym z takich moich wracoków jes MAGIA UCZUĆ, kiero w 2006 roku wyryżysyrowoł Tarsem Singh - tyn sóm, co niydowno szczelił nowo Śniyżka (tukej przeczytocie łó nij wjyncyj).

Prziznóm sie Wóm, że już żech trocha zgupioł. Pisoł żech sam już ło tyj produkcje, abo niy? Niy pamjyntóm. A nawet jakbych pisoł, to i co z tego? Dyć niydowno zaś żech na tyn film paczoł i mógbych łó nim szkryflać, szkryflać i szkryflać... :)

Lubia MAGIA UCZUĆ, bo przipómino baśń z tysiónca i jednyj nocy. To tyż tak przerywano bojka, łopowiadano na raty.

Scyny ze szpitalo (w kierym lyczy sie mało dziołszka i jedyn niydoszły samobójca), przeplatajóm sie sam ze scynami z wymyślanyj historie, kiero tyn "niydoszły" godo małyj. Trocha jak jo, sioszczynica i nasze wymyślane bojki. Łostatnio na przikłod ło sróniu, tygraszu i tygroszu. Ale co Wóm byda pisoł, łó naszych "wymysłach"...

Lepij zareklamuja MAGIA UCZUĆ, kiero pora lot tymu wyszła u nos na DiViDiczkach i durch idzie jóm jeszcze kupić abo sie pożycyć we wypożycalni. Nawet na necie idzie to lygalnie badnóńć - choby sam, na łoficjalnyj strónie dystrybutora. Warto!

Tarsym to król wizualnyj maestrii. Lata tymu nakryńcił na przikłod klip do "Losing my religion" grupy R.E.M. - teledysk, kiery chyba nigdy sie niy zestarzeje. Ale klip to ino pora minut fajnych kadrów, a MAGIA UCZUĆ mo ich dużo, dużo wjyncyj, bo trwo przeca prawie dwie godziny.

Praski most Karola, Motylo Rafa na Fidżi, niybieskie miasto w Radżastanie, Tadź Mahal w Indiach... - czego sam niy ma. No i jes ta cudno historia - łotrzykowsko we świecie baśni i autotymatyczno (ło poczóntkach kina) we szpitalu. Bo przeca spóminany już "niydoszły", to hollywoodzki kaskadyr, niyszczyńśliwie zakochany w jednyj gwiozdce kina.

No ja, pisza "szpital", chocioż może powiniyn żech użyć ślónskigo archaizmu "lazaryt". No nic... Ło lazarycie poczytocie sie wjyncyj tukej, a jo na kóniec wciepuja Wóm zwiastun MAGII UCZUĆ.

Łobejrzyjcie sie tyn film kóniecznie!!! Miłośniki Łorjyntu, bojek i historie kina pówninny być zachwycóne!