Czymu niy... :)

Trocha tych filmisków nóm w te lato kiniorze propónujóm, a z takich typowo "bojkoblogowych" w łoko wleciały mi dwa.

Pjyrszy to WAKACJE MIKOŁAJKA. Fany ksiónżek Ryne Goscinny'ego powinny być happy, a zaś jo, jak widza, że w jakim filmie ciupie Kad Merad, to tyż sie ciesza.

Łod czasu JESZCZE DALIJ NIŻ PÓŁNOC pacza na kożdy film, w kierym tyn chop gro i jeszcze żech sie niy zawiód! Terozki mómy z nim w kinach PRZIŁAZI FACET DO LYKORZA. Byłżech na tym w sobota. Polecóm! Pochichrocie sie, bo przeca gro tam tyż Dany Boon - francuski kómik-nastympca de Funesa.

Drugo propzycjo to kómputerowo-animowany TARZAN. KRÓL DŻUNGLE Reinharda Kloossa.

Jak sie myśla ło Tarzanie, móm tako trocha nostalgio. To przeca jedyn z nojstarszych herosów w dziejach kina.

Downo, downo tymu :) czaskało sie łó nim filmów, a filmów. A potym cosik sie posmoliło i już sie łó nim poleku zapóminało. Ale przeca to samo było z piratami, King-Kóngami i inkszymi wampirami, kiere potym triumfalnie wracały nazot na ykrany. Czy tak bydzie i teroz?

Niy bardzo chce mi sie w to wierzyć, ale życza tego Klossowi. Jako wtoś, kiery kocho klasyczne kino gatunków, byłbych skuli tego przeszczyńśliwy :)

Póniżyj trailery łobu filmów: