Bojkoblog (ze sioszczynicóm) wybroł sie na Videoszki. Co to takigo?

Ano, sóm to warsztaty dlo bajtlów, kiere łodbyły sie w katowickim kinie KOSMOS.

Bajtle uczyły sie na przikłod jak nakryńcić klip, jak wyglóndo filmowy plan i co to jes jynzyk filmu.

Zajyńcia prowadziła trójka Czechów (z kierymi żech sie fajnie po czesku pogodoł), a mało i inksze uczestniki warsztatów dowiedziały sie wto to jes kocur Mikeš. A jes to trocha taki... czeski kot Filemón :)

Jego twórcóm był Josef Lada - słynny malyrz i pisorz, kiery miyndzy inkszymi zilustrowoł Haškowi knigi ło Szwejku.

Fajniście ło Mikešu godała nóm Štěpánka Červinkovo - reżyserka, kiero skóńczyła słynno, prasko szkoła filmowo FAMU (ta sama, na kieryj uczyli sie tyż Miloš Forman, Agniyszka Holland, Emir Kusturica abo Jiří Menzel), a pómogali ji Hana i Michal, kierzy w Katowicach sóm już jakiś czos i kapitalnie przibliżajóm nóm czeskie kino, jynzyk i kultura tego kraju.

Jak wiycie, jako Ślónzoka (i Slezana!), pierónym mie w ta czeskoś cióngnie. Właściwie to cołko swoja ślónskoś w nij łodnajduja, bezto ciesza sie, żech sie do tego KOSMOSU kopnół.

Z tego, co żech widzioł na strónie kina (mocie jóm tukej), nastympno impreza to bydóm warsztaty na kierych dziecka bydóm sie mógły zrobić swojo własno kniga. 10 VII (ło godzinie jedynostyj) poprowadzóm je Iva Krupicovo i Marek Sibinsky. Miyjsce sie możecie zarezerwować mailowo (kasa@kosmos.katowice.pl) abo telefónicznie (numer 32 351 12 20). Wstymp jes bezpłatny.

Mioł żech sam na kóniec wciepać Wóm klip, kiery bajtle na Videoszkach robiły, ale że jeszcze go na Youtube niy ma, to wkleja sam jedyn z łodcinków ło przigodach kocura Mikeša. A teledysk z warsztatów bydzie na Bojkoblogu, jak go ino dadzóm do neta, ja?