Wahoł żech sie, wahoł, ale w kóńcu żech poszoł...

Kaj? No na ta CZAROWNICA z Angelinóm Jolie. Pisoł żech sam już ło tym filmie tukej, a wczoraj żech sie kopnół do kina i... Pieróna, warto bółó!

Jak żech tak na to paczoł, myślołek sie: dyć Fritz Lang jakby żył, to by sie załómoł. Jego ekspresjónistyczne NIBELUNGI wlazły do historii kina, ale niy wyglóndały tak pjyknie jak kadry z CZAROWNICY.

Wtoś powjy, że filmoznawcze herezje tukej pisza? A niych sie godo. Wjym co żech widzioł. Zdjyńcia jak ze żurnala, a przi tym tympo takie, jakie mo być (a niy tam jakeś dużyzny i flaki z łolejym, jak we WŁADCACH PIERŚCIYNIÓW).

Tyn łobroz to klasyczno, filmowo baśń, w kieryj mowa miyndzy inkszymi ło... poczebie baśni. Ło tym, że i dorosły (dziynki swoim dziecióm, a potym wnukóm) mo łokazja roz jeszcze zagłymbić sie w tyn pjykny, magiczny świot bojek.

Ale CZAROWNICA to tyż popis Angeliny Jolie. Ta produkcjo i jyj rola idzie zestawić z KLEOPATRÓM, KRÓLOWÓM KRYSTYNÓM, BARBARELLÓM... Myśla, że to marzynie kożdyj aktorki, że sie może w tako wyrazisto postać wcielić. Dló mie 10/10 i już czekóm, aż to na DiViDiczku bydzie! :)

A na kóniec cosik ło trocha mniyj wyrazistyj babie.

Piosynka do filmu śpiywo Lana Del Ray. Luuuuudzie, ta to mo ruła... Śpjywosz abo śpisz?! - chciałoby sie na nia ryknóńć.

Jo wjym, taki mo styl, ino że to już je trocha aus übermut durch tak samo, na jedne kopyto, smyńcić. No posuchejcie sie sami:

Już i zgobiki z Barely Political sie z nij chichrajóm. Łobejrzijcie sie ich skecz: