Kaj mómy Stadión Ślónski? Wiadómo - w Chorzowie. A Zómek Ślónski?

Tukej wiynkszoś ludzi bydzie musiała pómyśleć. A jak to nic niy do, wlyź na internet i tam trocha posznupać.

A jak sie już wysznupie, to sie bydzie miało uciecha. Jo przinajmij miołek i wreszcie tam dojechołek. Kaj? Do Łostrawy!

Ja, w Czechach (a tak po prowdzie to tyż na Ślónsku, ino tym czeskim), w Łostrawie, w miyjscu, w kierym łónczóm sie ze sobóm rzeki Lučina i Łostravica, stoi piykny slezskoostravský hrad, kiery mieli postawić w piyrszyj półówie czinostego wieku łopolskie Piasty, a potym sto razy go przebudowywać, łodbudowywać, rekónstrułować i tak dalij, a tak dál (jakby pedziały Czechy).

Gotycki gród powstoł, coby szczeg granicy z Morawami i handlowego szlaku, kiery lecioł łod Saksóni, bez Łopawa, Cieszyn, aże na Kraków.

Mie, jako samozwańczego blogowego bojkologa :) nojbardzij interesujóm legyndy i bojki z tym zómkiym zwiónzane. A trocha ich jes.

Godo sie, że pod zómkiym cióngnóm sie kilometrowe lochy i podziymne drógi, kiere lecóm pod rzekóm Łostrawicóm i idzie nimi dolyź aż do Zábřehu nad Łodróm. W niych tyż poukrywane majóm być roztómajte skarby, ino że niy ma leko sie dó nich dostać. Roz, że ino we Wielki Pióntek śmiyrtelnik mo szansa je łobejrzeć, ale żeby sie je tak zakosić do kapsy, abo do miecha, to tyż sie niy do. Pilnuje ich wachtyrz, železný muž, a mo je ułożóne do siedmiu beczek. W jednyj złote, w drugij srybrne - no w kożdyj inkszo zorta mónet...

Inno legynda godo, że na beczkach siedzi złoto kaczka z pisklokami, ale jakby wto chcioł je ściepnóńć i wzióńś sie piniyndzy, to zarozki wyskoczy wielki byjor (pies) i ciepnie sie na takigo.

Wto wiy, czy złoto niy łostało tam po urodzónym w 1600 roku zbójniku Xaverze Jáchymie Zachozyncu. Łón i jego siedmiu kamratów mieli na swoim kóńcie napady na zómki miyndzy inszymi w Bartovicach, Chuchelnyj, Klimkovicach, czy Kravařach.

Skóńczyli marnie - na szubiynicy, na dziedzińcu Ślónskigo Zómku w Łostrawie, na kierym mo tyż urzyndować Bioło Pani, kiero pojawio sie ino wtedy, jak zaś wtoś mo umrić.

Jakbyście chcieli coś wiyncyj poczytać ło Xaverze (giździe z Morawsko-Ślónskiego pograniczo) to kliknijcie sie tukej

No, a sam mocie galerio, kiero żech zrobił, jak żech tam bół.