Zamias ynty roz ykranizować bajtlóm te same biblijne historie, tukej twórcy chycili sie kónwyncji sciynce-fictón i...

Pisoł żech już ło "Chi Rho Tajymnicy " na Wiara.pl (tekst po polsku mocie tukej), bestóż dzisioj, na Bojkoblogu, może sie i tak trocha zdubluja, ale warto. Roz, że bojka fajno, a dwa, że tym razym móm dlo Wos nowy kónkurs.

Tyn animowany serial jes naprowdy pómysłowy. Zamias ynty roz ykranizować bajtlóm te same biblijne historie, tukej twórcy chycili sie kónwyncji sciynce-fictón i przenoszóm bahatyrów w czasie, dziynki czymu mómy we fabule trocha akcji (jes gyszpan), trocha humoru, a do tego to, co nojważniyjsze: biblijne scyny i fakty, ino że urozmaicóne, uatrakcyjnióne, dziynki roztómajtym zawirowanióm w czosie i przeszczyni.

Wydowo to u nos E-lite Distribution. Bydzie tego dziewiyńć tómików, a w kożdym znojdziecie płyta DVD z kolejnymi łodcinkami serialu, kolorowanka i fajniste teksty z łobjaśniyniami pokozywanych na ekranie biblijnych łopowieści. Wiadómo, Pismo Świynte warto łobjaśniać (nawet nóm, dorosłym), a tukej jes to robióne bardzo, bardzo fajnie.

Na przikłod: przi łokazji niywidómego Bartymeusza, bajtle mogóm sie poczytać, ło tym, jak to jes, jak się czasym paczy, a mimo wszisko niy widzi.

Jónasz – to łokazja, coby wyjaśnić, jak ważne sóm spotkania z Bogiym. Że cza mu czasym pedzieć, co i jak - w modlitwie, abo na spowiedzi.

Uchylóny zostanie rómbek tajymnicy, ło tym, jak bydzie w raju. Dowiymy sie tyż, jak to jes, że nawet z nojwiynkszego zła, kiere nos dotyko, Pónbóczek umi na kóniec wyprowadzić dló nos wielkie dobro. Styknie, że sie „wmiyszo” i gotowe.

***

No, to tela szkryflanio i zachyncanio, a terozki już czos na rozwiónzanie kónkursu, w kierym do wygranio bół I, II, III i IV tómik "Chi Rho Tajymnicy".

Miołek dlo Wos dwa takie pakety, do kierych dociepnół żech tyż gadżety - w tym treski (koszulki) - portalu Wiara.pl. Pytanie kónkursowe było takie: kiery z ywangelistów spómino ło Bartymeuszu? Mateusz, Marek, Łukosz abo Jón?  Szło ło świyntego Marka, a nagrody dostowajóm:

Aleksander Mendera z Mikołowa i Mariusz Szlachcic ze Chrzanowa 

Gratuluja. Kómplety poślymy Wóm pocztóm.