Twardowski nazot na ziymi
dodane 2014-03-12 07:04
Krakowski WAM wydoł łostatnio fajnisto kniga dlo dzieci. To "3 dobre uczynki" Marty Wiktorii Trojanowskij.
Ale wto wiy, czy tak samo jak tytuł, niy jes ważny tyż podtytuł tyj publikacje, bo brzmi łón nastympujónco: Twardowski wraco na ziymia.
Ja! Doczkali my sie. Legyndarny szlachciura, alchymista i czornoksiynżnik króla Zygmunta Augusta, co z diobłym paktowoł, jakimś cudym (łopisanym w knidze, ale niy zdradza Wóm jakim), ślecioł z ksiynżyca nazot na ziymia i terozki, w XXI wieku, próbuje łodkupić swoje winy.
Ale, co ciekawe, to niy Twardowski jes głównym bohatyrym "3 dobrych uczynków". W tyj roli wystympuje Maciek, kiery łazi do podstawówki i - po tym, jak mu umar łojciec - niy bardzo radzi sie we szkole.
Roz, że go inne bajtle pieróm, a dwa, że za pieróna niy umi pojóńć arkanów matymatyki...
No ja, ale przeca jes tukej Twardowski. Geómetria - wiedza powstało jeszcze we starożytności - to dlo niego żodyn problym, bezto uczy jyj synka, a tyn zaś pokozuje mu na przikłod, jak sie przibijo pióntki i tumaczy, wto to jes Batman abo Harry Potter...
Udano to kniga. Sóm w nij tyż czary, ale tych Twardowski, po wiekach, postanawio już używywać ino po to, żeby ludzióm pomogać.
***
No, to by było tela czyńści rezynzyjno-łopisowyj, a terozki już czos na wyniki kónkursu, kiery żech tu dlo Wos mioł.
Jak pisołek, w legyndach ło Twardowskim (i w "3 dobrych uczynkach" tyż) pojawio sie czynsto motyw magicznego zdrzodła, lustra, zwierciodła Twardowskigo. Dzisiej jes łóne przechowywane w jednyj z polskich bazylik. Pytanie brzmiało: Ło jako bazylika idzie? W kieryj miyjscowości sie łóna znajduje? Szło ło bazylika w Wyngrowie, a nagrody wylosowały czi dziołchy:
Joanna Di Vanno z Legnicy, Ewa Klimczyk ze Sosnowca i Agata Konopka z miyjscowości Zator
Gratuluja, knigi i gadżety Wiara.pl wyśla Wóm pocztóm.
