Downo żech takich gupot niy czytoł, jak kniga "Świynty Jerzy i legyndarno drużyna". Wydało to iuvi, ino ło czym to jes?

 

Na łokładce cerwóny smok, w tytule jedyn z nojbardzij znanych świyntych w dziejach, a w środku... ból i zgrzitanie zymboli.

 

Fusbaloki Barcy majóm problym, bo na ich stadión (kiery był "downo, downo tymu") przilecioł smok, kiery niynawidzi fusbalu i chce im zezrić wsziskie bale. No i czym potym bydóm grać?

 

Cza go jakoś pokónać, pra? Ino jak?

 

Pora strón dywagacji, a potym niy z gruchy, niy z pietruchy, wycióngajóm dupny herb Barcelóny i smok ze strachu przed nim zniko. Finito.

 

Jest tam jeszcze na kóniec mało wzmianka ło świyntym Jerzym i tyla.

 

Wydane jes to fajnie (rubo, lakierowano łokładka), ilustracje tyż niy sóm nojgorsze, ino ta treść... 

 

Jak na łoficjalne wydownictwo klubowe Barcelóny, jes to wstyd. Bele co naszkryflać, pora wóntków z baśniowyj kónwyncji wytachać i wcisnóńć bajtlóm, abo ich rodzicóm, kierzy kibicujóm tymu katalóńskimu klubowi.

 

Kuriozum. Hucpa. I kolejny tytuł, kiery mógby bez problymu dołónczyć do "Ksiónżek nojgorszych" Barańczaka. Niystety. Nowy rok Bojkoblog zaczół wyjóntkowo krytycznie! :)