Legyndarny harnaś jes nazot. Ale we wersji, jakij byście sie niy spodziywali.

Tym razym, zamias awanturniczego filmu abo knigi z górolskimi bojkami, mómy suchowisko, kiere przigotowoł Tyjater Dobrego Syrca, a na płytach CD wydało WARTO.

WARTO niy łod dzisiej słynie z kapitalnych suchowisk. Rok tymu pisoł żech na przikłod ło ich "Ksiynżniczce i rycyrzu", a terozki zachwolóm "Janosika i Dobrego Pastyrza", z kierego dowiycie sie miyndzy inkszymi, jak łoderwać bajtli łod internetu, abo jak móndrze pómogać ludzióm.

Łowce godajóm sam po ludzku i po koziymu, pofyrtane heksy (choby w jakim Mónty Pythónie) przeblykajóm sie za zbójników i chcóm rabować i rojbrować, ino że cosik im to niy idzie, a skołowany Janosik sóm niy wiy co robić. Sztudirować? Zbójować? Rzykać?

Pisza tego bloga po ślónsku ale dziynki "Janosikowi i Dobrymu Pastyrzowi" bydziecie mieli łokazja posuchać sie, jak sie godo, a przede wszyskim śpiywo po górolsku, bo przeca i piosynek niy mógło tukej braknóńć. Wszyskie łóne to znane górolskie melodie, ino że ze zmiyniónymi, dowcipnymi słowami. Tukej mocie próbka.

Myśla, że kożdy wto sie ta płyta puści, bydzie mioł wielko uciecha, a przi tym posucho tyż ło rzecach piyknych, ważnych i móndrych.

Suchowisko możecie sie kupić na www.warto.com.pl, a szło je wygrać tyż u mie. Stykło przisłać łodpowiydź na pytanie kónkursowe, w kierym pytołek sie ło imie i nazwisko aktora, co zagroł Janosika we filmie Agniyszki Holland "Janosik. Historia prowdziwo". Był to Václav Jiráček, a wiedzioł to m.in.

Mateusz Rebelka z Poznanio

Tego chopa żech wylosowoł i to łónymu jeszcze dziś wyślymy płyta ze suchowiskiym + treska (czyli koszulka) portalu Wiara.pl. Gratuluja :)