Fajnisto rzec wysznupoł żech łostatnio w Ympiku.

Book House wydoł sztyry ksiónżeczki w ramach serii "Bojki z pacynkami". Jes sam Kopciuszek, Kapturek, Jaś i Małgosia no i śpiónco królewna.

Ksiónżeczki, jak ksiónżeczki - fajnie wydane, ale chyba jednak trocha za bardzo skrócóne. Wola duższe, grimmowskie wersje tych klasycznych bojek, no ale po piyrsze: te sie moga u Grimmów doczytać, a po drugie: niy ma co ślimtać, bo przeca sóm pacynki.

Kapitalny pómys mieli w tym Book Housie. Zaroz my sie z małóm zrobili mini-tyjater i łodegrali historia śpióncyj królewny, bo akurat ta mini-kniga
prziniós żech do dóm, a myśla, czy i reszty niy kupić i potym niy pomiyszać trocha tych historii, poplóntać losów bohatyrów choby we "Shreku".

No, a na kóniec mały bónus - tyż ło tyj śpióncyj frelce z bojki. Bo widzicie, wyczytołek łostatnio u Artura Szrejtera, w jego "Demónologii germańskij", że ta historia, kiero Grimmy spisały, może mieć tak naprowdy gyneza mityczno.

Łotoczóno przez róże, śpiónco bohatyrka, Szejterowi zarozki skojarzyła sie z walkirióm Brunhildóm abo boginióm Myngladóm, kiere tyż (jak wyczytoł w "Eddzie") podobnie uwiyńzióne były. A zaś te wróżki, co to prziszły na chrzciny (dwanoście dobrych, czinosto zło), to wedug niego baśniowo wariacja na tymat mitycznyj historii ło łobrażónyj Nornie, germańskij bogini przeznaczynio, kiero tyż wywinyła podobny numer, ino że niy dziołszcze, a synkowi - poecie Norna-Gestowi.

Ciekawo sprawa. Tak samo, jak porównanie królewny Śniyżki z downóm, pogańskóm boginióm przirody Berchtóm.

Coś czuja, że byda do tego Szrejtera czyńścij zaglóndoł... :)