Nowo produkcja bielskigo studia animacji.

Wyczytoł żech w weekynd na necie, że animatory z legyndarnego Studia Filmów Rysunkowych w Bielsku-Biołyj bieróm sie za nowy serial.

Mo to być cykl ło przigodach dwóch gizdów-bracików (Kuby i Śruby), kierzy jakimś cudym, (na przikłod na furgajóncym łodkurzaczu), trefióm do świata bojek, a tam spotkajóm miyndzy innymi Czerwónego Kapturka, Królewna Śniyżka z cwergami, smoka, czy Baba Jaga...

Gotowe sóm już dwa piyrsze łodcinki. Prymierowy nazywo sie "Porwano królewna" i możecie sie łó nim poczytać tukej

Co ciekawe, piyrsze łobejrzóm serial Czechy - bo sóm jego koproducyntami. Móm nadzieja, że puszczóm go na ČT :Déčko - ich nowym programie dlo bajtli - to sie go ze sioszczynicóm (a może i ze sioszczyńcym - jak już bydzie wiynkszy) łobejrza :)

Wiyncyj ło Kubie i Śrubie w tekście Marcina Czyżewskigo z bielskij "Gazety Wyborczyj", kiery jes do przeczytanio sam, a widoczno tukej ilustracja zakosiłek ze stróny bielskij wytwórni. Jyj adres to www.sfr.com.pl - zachyncóm do zerkniyńcio na nia. Jes tam niy ino galeria ich bojek, ale i możliwoś wirtualnego szpaciru.