Cołkie szczyńście, żyjymy w XXI wieku, a kina sóm niy ino multipleksowe, ale i dómowe i internetowe. I to w jednym z nich w tym roku Bojkoblog uczcił Dziyń Kałużyńskigo.

 

Na Iplex.pl puścił żech sie wyreżyserowano przez Philippe Leclerca bojka "Ksiynżniczka Słóńca". Ciekawo to animacja. 

 

Belgi, Francuzy i Wyngry zrobiły film, kiery niby mo być do dzieci, ale tak naprowdy wiyncyj w nim historii i religii starożytnego Egiptu, niż klasycznyj baśni, a zamias chałpek heks i kómnat czornoksiynżników, mómy sam raczyj duchy przodków urzyndujónce w piramidach i świóntyniach.

 

Rzóndzóncy Farałón - kiery durch ino medytuje i rzyko do słóńca - chce wprowadzić jednobóstwo (jedynym bogiym mo być Amón). Ino że niy bardzo sie to widzi kapłanóm wyznajóncym Amóna-Re, kierzy spiskujóm z Hetytami planujóncymi Egipt najechać.

 

Ale to wszysko ino tło. Bo głównóm, tytułowóm bohaterkóm, jes sam zbuntowano cera Farałóna i to jyj niysamowite perypetie (miyndzy innymi wyprawa do Teb, a potym do Nefertiti, na wyspa Elefantyna) mogymy łoglóndać w tyj bojce.

 

Myśla, że kożdy, wto za bajtla paczoł na Indany Jónesa i chcioł być egiptologiym, polubi tyn film. Mie w kożdym razie sie podoboł, bezto polecóm. A Wy, legalnie i za darmo łobejrzeć możecie go tukej