No i żech sie doczekoł. Kniga "CzarLa. Poszukiwacze" idzie już kupić. Pytanie ino, czy warto?

Warto, warto. Zachwolóm jóm sam, kaj możecie sie tyż kóncek tyj powieści posuchać. A tukej, na Bojkoblogu, bajsna ta kniga z trocha innyj stróny.

Jak żech sie tak ta "CzarLa" czytoł, spómniało mi sie, co Kałużyński kiedyś ło Fantómasach z DeFunesym pisoł.

W siedymdziesióntym drugim Zygmunt Kałużyński wydoł zbiór "Pożegnanie Molocha", w kierym znaloz sie tekst "Kryminał baśniowy". Pisoł w nim, że kinowo seria ło przigodach Fantómasa to nic inkszego, jak uwspółcześnióno bojka/baśń.

I richtig, jak tak ło tym pómyśleć, to, co pochoł Fantómas, numery kiere robił kómisarzowi Juve, downij móg robić ino fikcyjny, baśniowy magik, czornoksiynżnik, czy inkszy, mityczny trickster. Ino że we filmach ich zaklyńcia i eliksiry zastómpiły gadżety i wynalazki.

„Sekretem sukcesu Fantomasa jest więc połączenie dawnej fantazji ze współczesną, owej romansowej ze sputnikową. Kryminał zmienił się tu w baśń, w której przemieszały się elementy dawnego romantyzmu i dzisiejszej techniki. Obydwa zaś traktowane jako zabawa, w której zachowuje się rozmyślnie to, co naiwnie umowne” – pisoł Kałużyński, kierego po polsku cytuja.

To samo mómy z "CzarLóm". Niby science-fiction, niyby na jakijś Łorbónie sie to dzieje, w kosmicznym mieście Solicium. Ino, że jak sie tak bliżyj przijrzeć, ściepać tyn kostium-skafander zwany sam kurtizelkóm (połónczynie kurtki i kamizelki), to zoboczymy, że to typowo bojka, w stylu "Alicji w krainie czarów".

Stwory i rośliny sóm kósmiczne, ale przeca akcja toczy sie w typowym lesie. Miasto do kierego zawyndruje bohatyrka jes futrystyczne, ale trefi w nim do chałpki Arius, kiero pełni rola typowyj, mitycznyj wyroczni abo znanyj z bojek heksy ze szklónóm kulóm.

Dobrze jes czytać ta kniga i pod tym kóntym. A przi łokazji pamiyntać ło Kałużyńskim. Dyć zbliżo sie jego dziyń.

Ło inicjatywie Dziyń Kałużyńskigo pisoł żech już pora razy, to i w tym roku zachyncóm do łobchodów, a szczegóły doczytocie sie w moim
starszym tekście, kiery znojdziecie tukej