Bryan Singer - szpec łod kómiksowych filmów ło X-mynach i Supermynie - wziół sie tym razym za klasyczno, aglosasko baśń/bojka, kieryj bohaterym jes synek imiyniym Jack. 

 

W knigach jego przigody sóm roztómajte, bo tyż jak to z bojkami bywo, kożdy co je godo abo spisuje, robi to trocha inaczyj. Coś przemiyni, coś dodo łod siebie, ło czymś zapómni i potym mómy dziesióntki, abo i setki wersji i zortów. A że tukej mómy do czyniynio z hollywoodzkóm ekranizacjóm, to i ulepszyń, udziwniyń i dopowiedzyń mómy wiyncyj, ale wszyskie po to, coby akcja była gyszpan, a widz sie niy nudził.

 

Jo żech sie niy nudził, czyli udało sie. Wiym, że jak tyn film właził do kin w USA, to godało sie że klapa, że to tako kolumbryna, co kosztowała dwiesta miliónów dolarów, a zarobiła w piyrszy weekynd ino dwajścia łosiym, ale dyć niy byda paczoł na takie newsy. Lepij paczeć na sóm film, a tyn naprowdy jes niyzły.

 

Już łobsada robi wrażynie. Ewan McGregor, Stanley Tucci, Eddie Marsan, Ian McShane, Ewen Bremner to tako aktorsko ekipa, że paczy sie na nich z  przijymnościóm, a jes przeca jeszcze Nicholas Hoult, kierego pamiyntocie pewnie z "About a Boy" z Hugh Grantym  [ino jak to bydzie po naszymu? "Był sie bajtel"? :)] i Eleanor Tomlinson, dziynki kieryj mómy we filmie niy ino łolbrzimy, kiere cza pokónać,  ale i love story, kiere w Hollywood musi być. Ale przeca w bojkach tyż zawsze było. Kónwyncjo rzec świynto!

 

Ciekawie jes pokozano kraina łolbrzimów. Leży pónad chmurami, dostać sie dó nij idzie po łodydze, kiero wyrósła z ziorka magicznnyj fazole, ale mie sie nojbardzij kojarzyła z wyspóm King Kónga. Te same mgły, ta sama aura tajymnicy. Piyknie wymyślóne.

 

Sóm Jack (wspómniany już Nicholas Hoult) tyż jes ciekawy. Ta jego skórzano jakla przipómino trocha to, co łobleczóne miół zawsze Indiana Jones. Brakuje ino fedory na gowie :)

 

Czy polecóm? Jasne, że ja! Ino niy wiym, czy jes to film dlo nojmłodszych widzów. Bo jak sie tak popaczeć na te łolbrzimy, byjory, to bajtle mogóm sie ich boć. Bezto dejcie sie pozor.

 

A wszyskim spragniónym psychologicznych interpretacji (i nadinterpretacji) bojek ło przigodach Jacka, polecóm klasyczno kniga "Cudowne i pożyteczne" Bruno Bettelheima. Znojdziecie tam cołki rozdział na tym tymat. 

 

***

 

Film dystrybuuje u nos firma Galapagos, a sam mocie jego zwiastun: