Czyli sto lot Syrynki, kónkurs i kaj te utopce?!

W zeszły pióntek kopynhasko Mało Syrynka (a kónkretnie jyj rzeźba) miała piykno rocznica. Duńczyki postawiły jóm sto lot tymu, coby uczcić pamiyńć Hansa Christiana Andersyna i łod tego czasu jes łóna jednóm z wiynkszych atrakcji ich stolicy.

Pisała ło tym Polsko Agyncja Prasowo, bezto łodsyłóm Wos do tekstu depeszy, kiery znojdziecie tukej, a zdjyńcie syrynki, kiere mocie po prawyj, zrobiła Eva Rinaldi. Fota jes wziynto stónd.

***

Znocie misia Kazimierza? Do tyj pory ukozały sie łó nim dwie knigi: "Lato misia Kazimierza" i "Przigody misia Kazimierza", ale ich autorka, Paulina Wilk, pisze już czeci tóm i, co ciekawe, zapraszo tyż do jego pisanio młodszych czytelników. Szczegóły kónkursu mocie sam, a przi łokazji warto tyż wlyź na łoficjalmo stróna misia Kazimierza, czyli na www.miskazimierz.pl

***

I na kóniec moje ukochane utopce. W łostatnim numerze lokalnych "Tychów. Naszego miasta" idzie przeczytać fajny artykuł o Rómanie Nydze. To chop kiery miyndzy innymi wyrzeźbił utopce straszónce na bieruńskim rynku. W gazecie pisali, że bydzie je szło łobejrzeć na ich strónie www.tychy.naszemiasto.pl, ale abo jo żech jes zawalaty i niy umia tam tych fot znalyźć, abo ich (jeszcze?) niy wciepli.

Bezto łodsyłóm na stróna Bierunia, kaj tako galeria jes. Kliknijcie sie tukej i podziwiejcie! :)