Dzisioj na Bojkoblogu cióng dalszy wspómniyń z Pragi.

Zaroz piyrszego dnia pobytu, jak żech sie ino znod na Vaclavaku, mómyntalnie zaczół żech szukać ksiyngarni. Niy moga za to - literaturoznawcy tak majóm. Smolić zabytki, smolic pómniki - kaj sóm knigi!? :)

Jak już sie mi udało zlokalizować Dům Knihy, polecioł żech tam i zaczyły sie kolejne poszukiwania - za działym z pohadkami, czyli czeskimi bojkami. Roz-dwa żech go wyczaił, a tam w łoko wpod mi tytuł "Krysáci".

To tako trocha kóntrowersyjno bojka. Roz że jyj bohatery (m.in. Hubert i Hodan), to żyjónce na wysypisku szczury z hasioka. A dwa, że te wysypisko jes na Morawach, bezto niykierzy w Czechach ciepali sie nawet, że to niy niy jes do dzieci, bo to przeca dwa morawskie separatysty!

Widać, w Czechach Morawioki (tak jak w Polsce Ślónzoki) robióm za ichniyjszo zakamuflowano opcja.

***

Inno bojko-zdobycz to DVD (abo, jak godajóm Czechy: dividiczko) "Dvanáct měsíčků".

Czesko telewizja puszczała ta pohadka na Boże Narodzynie, ale niystety, skuli praw autorskich, czy inkszego pierziństwa, niy mógłek tego filmu łobejrzeć na www.ceskatelevize.cz/ivysilani.

No nic, jakoś przeczimołek do lata i terozki poszoł żech sie do Bóntónlandu na Vaclavaku, żeby sie to kupić. Udało sie, a jeszcze przi łokazji trefił
żech tam Karela Gotta. Naprowdy! :)

"Dvanáct měsíčků" to bojka kiero spisała Božena Němcová, a jes łóna dlo Czechów mniyj wiyncyj tak samo ważno, jak Jakub i Willhelm Grimm dlo Niymców. Autorka-ikóna baśni, bojek, pohadek.

Reżyser Karel Janák zdecydowoł sie, że w jego ekranizacji tytułowych dwanoście braci-miesiyncy to bydóm chopy, przipóminajónce trocha druidów. Żyjóm łóni na tajymniczyj, wysokij górze, a na jyj wjyrchu jes kamiynym króng, kiery wyglóndo choby Stonehenge.

Pómys kapitalny! Elegancko pokozano i zasygnalizowano celtycko przeszłoś czeskij ziymi, kiero nawet swojo łacińsko nazwa (Bohemia) zawdziynczo celtyckiymu plemiyniu Bojów.

No. Na dzisioj tela, a na kóniec videoklip prómujóncy "Dvanáct měsíčků". Śpiywo Ondřej Ruml: