Już niydugo Tydziyń Kultury Beskidzkij. Pińdzesiónty już!

Górole w Szczyrku, Żywcu, czy Jabłónkowie zaś bydóm świyntować i asić sie swojiymi tradycjami. Natańcujóm sie, naśpiywajóm, a i beskidzkich bojek, ło pastyrzach, zbójnikach i inkszych gizdach pewnie posuchać pódzie.

Wszysko co byście chcieli wiedzieć ło tyj imprezie (kiero potrwo łod 27 lipca do 4 siyrpnia) znojdziecie tukej, a jo propónuja Wóm dzisioj beskidzko bojka ze wspóminanego wczoraj zbioru Kornelii Dobkiewiczowyj „Sztolnia w Sowich Górach. Baśnie i opowieści z ziemi opolskiej, Beskidów i Dolnego Śląska”.

Idzie mi ło tekst „Uwiyńzióno woda”, w kierym w Beskidach pojawio sie smok. Mo dziewiyńć głów i żodyn niy umi sie z nim dać rady. Żodyn? No, niy do kónca…

Jes przeca jedyn bajtel, kiery napuści na smoka… Tatarów. Te pieróny zrobiły swoje w bitwie pod Legnicóm, a terozki zapuściły sie w Beskidy, kaj tyż myślóm co napochać.

Udo im sie? A kaj tam! Dyć je to bojka. Górole dadzóm sie rady i ze smokiym i z dzikimi Azjatami. A jak? To już sie musicie przeczytać sami.

Zachyncóm do lektury. Informacje ło knidze Dobkiewiczowej znojdziecie na strónie wydownictwa Zysk i S-ka. Styknie kliknóńć tukej

A terozki, na kóniec, zagrajóm nóm i zaśpiywajóm po górolsku Istebnioki: