Czyli słowacko łodpowiedź na czeskigo Rumcajsa.

Wczoraj w Czeskij Telewizji puścili łostatnio czyńś kapitalnego programu Celnice Colnica, w kierym Czechy i Słowoki godali ło swoij wspólnyj historii i ło tym, co ich terozki łónczy abo dzieli.

Czy tako audycja byłaby możliwo u nos? Czy Ślónzoki i Poloki tyż by sie tak umiały pogodać? Tego to jo niy wiym, ale tyż w takie rozważania dzisioj (po weekyndowym Marszu Autonómii, ło kierym wiyncyj przeczytocie tukej) włazić niy byda.

Zamias tego podziela sie swoim łodkryciym. Paczołek na ta „Celnice Colnica” i tam mignół mi jakiś taki mały, animowany, górolski gizd, Jurošíkiym zwany. Zarozki zaczół żech sznupać za nim na necie i co sie łokozało? Że Jurošík to słowacko łodpowiedź na czeskiego Rumcajsa!

Słowoki zaczyły kryńcić ta bojka na poczóntku lot ’90, a niydowno (jak piszóm w słowackij Wikipedii) czaśli kolejne czyńści.

Niy byda sie sam rozpisywoł, ani bawił w głymbsze analizy tyj produkcji. Łobejrzijcie sie jóm lepij sami. Na Youtube internauty nawciepowały tego tela, że kożdy znojdzie coś dlo siebie.

Jo na poczóntek proponuja łodcinek, w kierym Jurošík zmago sie z utopcym i ratuje życie i dusza wysoko urodzónymu topielcowi. A jak kómu mało, to sie może kulnóńć do Tychów. W sobota muzeum łopanujóm utopce, skarbniki, połednice, jaroszki i insze cwergi i skrzoty. Szczegóły znojdziecie sam

A terozki już bojka (niby słowacko, ale przeca pokozano w nij historia idzie tyż znolyź w dziesióntkach i czeskich i ślónskich baśni):