Dzisioj może co po ślónsku bych sam sie zaś naszkryfloł…

Łokazja jes ku tymu kapitalno. W knidze „Slezke pohadky, a povesti” znod żech tekst, kiery mo tytuł „Černokněžník”. Spisoł go František Sláma, a jes to ślónsko bojka ło… cyntaurze.

Ja, ja! Antycznym, starogreckim cyntaurze, kierego znómy z mitologie.

No przeca w życiu żodyn by niy pedzioł, że cyntaur może mieć co wspólnego ze Ślónskim i naszymi ludowymi bojkami, pra? A tukej taki numer.

Jak pisoł Sláma, był roz czornoksiynżnik, kiery swoimu słudze pedzioł, że mo mu ucióńć gowa i posiekać reszta ciała na kóncki, a potym wciepać to do kadzi i na siedym lot zakopać na gnojoku.

Synek, jak dostoł taki prikaz, to go wykónoł, ale że niy dowało mu to pokoju, to przed upływym tych siedmiu lot, wykopoł kadź, i jak jóm łotwar, wyskocył z ni pół chop – pół kóń, kiery zarozki mu uciyk i polecioł w świot, kaj mordowoł ludzi.

Ta i inksze bojki Slámy znojdziecie on-line tukej – teksty sóm po czesku.

Polecóm, a „Černokněžník” to łod dzisioj naszo baśnioblogowo bojak tego tydnio.

Przi łokazji polecóm tekst Marka Szołtyska „Trojoki i trojanie”, w kierym pora antyczno-ślónskich ciekawostek tyż znojdziecie.