Waldek "King" Fornalik zamias Ruch bydzie trynowoł kadra Poloków. Kibice Niybieskich łod wczoraj w rozpaczy. Dosłownie!

Katowicko "Wyborczo" puściła dzisioj na necie nawet tekst "Kibice Ruchu już tęsknią za Fornalikiem. Dzwonią na Cichą i płaczą do telefonu".

Fornalik cołko piłkarsko kariera - i kupa lot jako tryner - spyńdził w Chorzowie, ale urodził sie w Myślynicach.

No to tak na pożegnanie z Chorzowym (i z nadziejóm, że zaś dó nos kiedy nazot przidzie), przipómna na jego cześ na Baśnioblogu legynda ło myślynickim zómku, kiery wto wiy, czy niy łostoł wysadzóny do luftu, skuli rezydujóncyj w nim Katarziny Włodkowyj z Barwałdu.

Tak jóm zabili? A może spolili na stosie?

Wersji jij śmierci jes pora, a pamiyntać czeba, że Włodkowo przeszła do historii jako zbójniczo raubritterka i do dzisioj sie pónoć w ruinach zómku w Myślynicach pojawio. Nawet Jan Dugosz łó nij pisoł! No, a terozki bydóm szkryflać ło Fornaliku.

Już mi chopa trocha szkoda, bo wiadómo, jak to z Franzym Smudóm było. Jak prziłaził, to mioł "czynić cuda", a jak sie skóńczyło, to wiymy. Kibole i media sóm bezlitosne. Wyżywajóm sie potym na tych trynerach-borokach, tak choby to łóni, a niy fusbaloki, lotali po murawie. Szkoda godać...

Lepij poczytać jako baśń, bojka abo legynda! :)