Bojek i baśni było w tyn czos niymało, ale nojprzód wyjaśnia, czymu zaś po ślónsku sam tekst wciepuja.

Wszysko skuli Marszu Górnoślónskij Tożsamości. Bezto, tak trocha na znak solidarności z tymi, kierzy tam maszyrowali, pisza po naszymu/swojymu :)

*

Mielimy w pióntek Dziyń Dziecka, beztoż Baśnioblog niy mo dzisioj problymu z selekcjóm i doborym tymatów. Pisołek już na Wiara.pl ło Kopciuszku na Dzikim Zachodzie, kiery trefił do naszych kin, ale przeca to niy jedyny nowy baśnio-film, kiery dystrybutory wprowadziły na ekrany piyrszego czyrwca.

Jes jeszcze „Królewna Śniyżka i Łowca” z Kristen Stewart i Charlize Theron w rolach głównych, kaj z klasycznyj grimmowskij bojki, Amerykóny zrobiły batalistyczne fantasy. No i jest tyż „Twojo staro. Baśń” – ni to offowo, ni kabaretowo polsko produkcja, w kieryj główny bohatyr spotyko miyndzy innymi Czerwónego Kapturka, Robin Hooda, czy Smoka Wawelskigo.

Jakby tego bóło mało, miysincznik „Film” dociepoł do czyrwcowegu numeru „Popioły czasu: powrót” na DVD. Chińsko, óniryczno, poetycko historia, w kieryj niy bardzo wiadómo ło co loto, ale kadry sóm piykne, baśniowych wóntków i ylymyntów trocha tyż idzie znalyź, no i nazwisko reżysera robi swoje – Wong Kar-wai. Jes żech w połówie, ale niy gwarantuja, że to dóm rady dzisioj skóńczyć.

*

Nojwiynkszy hit tego weekyndu to u nos w dóma szkocko legynda ło Łorzechowyj Kasi. To cera złyj hrabiny, kiero hajtnyła sie z królym, no ale tyn król mioł tyż swojo cera z piyrszego małżyństwa, zwano Gładkolicóm.

Gładkolico i Łorzechowo Kasia sie lubióm, ale hrabina-macocha boi sie, że to Gładkolico erbnie trón, a niy jyj rodzóno cera. Beztoż włazi w kónszachty z wiedźmóm, kiero sprawio, że Gładkolico zamias swoij gymby, mo... barani łeb.

Łorzechowo Kasia rzecz jasno znojdzie knif, coby jóm łodczarować (tytułowe łorzechy bydóm tukej kluczowe), a łobie przirodnie siostry trefióm na kóniec na królewiczów, czyli finałowe wesele mocie jak w banku.   

Historia ta jes ze zbioru „Legyndy szkockie” – polecóm gorónco!

*

A na kóniec trailer „Twoij staryj. Baśni”. Sóm niy wiym – śmioć sie, czy ślimtać...