Wiela to jo żech dzisioj społ? Czi godziny? Dwie i pół? No tak żech sie tym wczorajszym szpilym znerwowoł...

Do nocy żech siedzioł i paczoł, jak Ruch eliminowoł Wisła w elwrach i bydzie groł we finale Pucharu Polski. Durch mo tyż szansa na majstra, a choby ani pucharu, ani piyrszego miyjsca w lidze niy zrobił, to i tak może bydzie groł w europejskich rozgrywkach, jako tyn tytułowy kopciuszek.

Czymu kopciuszek?

A jak inaczyj nazwać ekipa z Chorzowa, kiero budżet mo mizerny i żodnych wielkich gwiozd w składzie? Teoretycznie niy mómy w lidze szans. Ale ino teoretycznie...

Dobry tryner, solidne fusbaloki + tak zwano miyszanka rutyny i modości i jakoś tym Niybieskim już czeci rok z rzyndu idzie. Niy ma co na razie dzielić skóry na niydźwiedziu, ale czimia za tych pierónów kciuki i wto wiy. Może co w tym sezónie ugrajóm, a potym... A potym zaś bydymy sie sztresować, że z roztómajtymi Kazachami i Maltańczykami niy ma leko :)

***

Katowicko „Wyborczo”  podowo, że miasto Pszczyna bydzie sie prómować jako "Perła Ksiynżnyj Daisy". Maria Teresa Oliwia Hochberg von Pless może i baśniowóm ksiynżniczkóm niy była, ale fest ciekawo to postać, bezto warto coś łó nij poczytać. Na zachynta propónuja linka do tekstu „O księżniczce, która ośmieliła się być i piękną i mądrą” z łoficjalnyj stróny zómku Ksiónż. Styknie kliknóńć tukej

Toż klikejcie i czytejcie, a jo ida "mordować" kolejno kinga. Terozki chycił żech sie publikacji "O ukrytych skarbach, śpiącym wojsku i kochance diabła, czyli, bajki, podania, opowieści ze Śląska Cieszyńskiego i ziemi pszczyńskiej". Cza sioszczynica trocha postraszyć utopcami, jak mie za bajtla straszyli. Godołek! Niy ma leko... :)