Filmowe bojki i baśnioki
dodane 2014-08-08 09:49
Lista, lista, lista! Abo takie moje małe TOP TYN :)
No, to żech sie nasznupoł, napaczoł, naspóminoł i jes. Zestow tych bojek i baśniowych filmów, kiere uważóm za nojfajniyjsze.
Jak znóm życie, pewnie żech ło jakichś zapómnioł, niykiere przepasowoł, ale co jo moga... Wciepna Wóm sam mojo luźno poropozycjo, a Wy sie już sami swoje prywatne listy tam poukłodocie w dóma, jak bydziecie chcieli.
1. MAGIA UCZUĆ - pisoł żech już ło tym filmie tukej - wjyncyj dodować niy czeba. Jes to majstersztyk i tela. Ta fota, co jóm widzicie, to kadr z tego filmu. Pjykny, pra?
2. DWANOŚCIE PRAC ASTERIKSA - antyk i celtyk dlo nojmłodszych. Durch fajnisty, durch zachyncajóncy do zainteresowanio sie historióm, starożytnościóm... Myśla sie, że Uderzo i Goscinny zrobili dlo tyj dziedziny wiedzy, jakóm jes historia i mitologia wjyncyj niż wjynkszoś uniwersyteckich wykłodowców.
3. ANDEL PANE - łopisany już na Bojkoblogu (sam) czeski hit śwjónteczny. Ideał pohadky!
4. PRZIGODY BARÓNA MUNCHAUSYNA - Terry Gilliam w reżyserskij formie. Te plynery, te kostiumy, te scynografie... Jakbych mioł jakiymu ufokowi-kosmitowi wytumaczyć, co to jes "film", pokozołbych mu akurat to.
5. CZAROWNICA - nojnowszy, tyż już (tukej czaśniynty) bojkohit z Angelinóm Jolie. Wizualno-nastrojowo perełka. Kóncek XXI-wiecznego neo-kómpo-kina - wykreowanego w dużyj mierze na kómpie. Ale za to jak!
Tak by wyglóndała pjyrszo pjóntka. Dalij móm czi Disneye (KRÓLEWNO ŚNIYŻKA z 1937, KOPCIUSZEK z 1950 i PIOTRUŚ PÓN z 1953) - bo to pjykne spómniynia z czósów bycio bajtlym.
Potym bydzie narniowy KSIÓŃŻE KASPIAN z 2008 (za niypowtorzalno atmosfera) i telewizyjno ALICJO W KRAINIE CZARÓW z 1999. Martin Short, Gene Wilder, Liz Smith, Miranda Richardson, Whoopi Goldberg, Christopher Lloyd, Robbie Coltrane, Peter Ustinov, Ben Kingsley, Tina Majorino... Wejrzyjcie sie ino na ta łobsada. A potym na surrealne sekwyncje z tego filmu. Niy bydziecie żałować!
No, to tak wyglóndo mój - na gibko szkryflany - TOP TYN.