"Śląsk był 180 lat przy Niemcach, a teraz minęła 90. rocznica zarządzania Górnym Śląskiem przez Poloków. Jedni warci drugich".

Tyn cytat, kiery widzicie na wiyrchu, jes z jedego z łostatnich felietónów Kazimierza Kutza i od duższego czasu za mnóm łazi. Nastympny cytat tyż za mnóm łazi – i to dugo dużij, bo Josef Mlejnek, jeszcze w czasie Euro 2012 pisoł tak: "czeska pycha (...) w oparciu o pewne wskaźniki prosperity i rozwoju technicznego, stale uważa Czechów za jedynych zachodnich Europejczyków, a wszystkich pozostałych Słowian za Azjatów”.

I tak sie to na tym moim Ślónsku durch ściyróm z tóm niymieckościóm, polskościóm, czeskościóm – łostatnio nojwiyncyj z czeskościóm właśnie. To w nia – zahaczajónco ło ślónskoś - citóm łod tych haj (haji? hajów?) polsko-niymieckich i niy ukrywóm – fajniście mi tam :)

Zaczółek nawet kibicować we fusbalu Banikowi Łostrawa („Moravskoslezsky Denik” pisze łó nich ofyn: slezský klub), a niydowno najechoł żech kolejno kapitalno publikacja, kiero w Polsce jes kómpletnie niyznano, a mie ciepła na kolana.

To "Slezské báje a pověsti národní", kiere pozbiyroł i pospisywoł Karel Jaromír Bukovanský. Chop tyn założył na tyn przikłod w 1872 r. Muzeum Łostrawskie, a piyńć lot potym wydoł „vlastním nákladem” wspómniane sam ślónskie bojki.

Ledwo, żech sie przetumaczył i przeczytoł „Slezské pohádky a pověsti” Františka Slámy (pisołek łó nich sam), a już móm nastympno e-kniga do przełoranio.

No nic, cza sie za nia brać, a już coś czuja, że to kieroś z bojek spisanych przez Bukovanský’ego bydzie tukej niydugo baśnióm tydnio :)