...spytoł sie mie łostanio znajómy, bo wjy, że prowadza Bojkobloga, a i w ogóle, móm do bojek słaboś.

Chciołek mu coś łodpedzieć, alech sie zawiesił. Bo w sumie co jo to łostatnio za bojki pacza?

A ja! Z bajtlami siorki roztómajte Batmany paczymy. Kreślóne, animówane, superbohatyrskie. Aly tyż coroz czyńścij widza, że sioszczyniec ze sioszczynicóm, to wolóm już "bojki grane". Tyż ło superbohatyrach, ale takie co w nich prowdziwe ludzie (aktory) grajóm. No to próbujymy: bóły już "Suicide Squad", "Catwoman", a w planach "Flash Gordón" abo "Elektra". A i pewnie "Capitan Marvel" za czos jakiś sie trefi, jak ino do kin to pódzie. 

Bo przeca to tyż bojki. Z kosmosu, z mutantami i roztómajtymi, inkszymi, stworoczkami... Ale niy powjym, trocha mi sie już cni za klasykóm. Beztóż suchóm sie łostatnio (po rusku) ALICJI W KRAINIE CZARÓW, a i na BEOWULFA czekóm, bo majóm puścić łó nim nowy syrial na Epic Drama (tak przi łokazji: polecóm wszyskim tyn kanał. Jak lubicie kostiumy i historyczne klimaty, to jes to kanał w sóm roz do Wos).

No i tak to łostatnio wyglóndo.

Może co sie ruszy, jak zaś pojada na Czechy? 

Mielimy łostatnio na Wiara.pl (kónkretnie tukej) fajnisty artikel ło Cieszynie i Těšínie, no i jak żech go ino łobejżoł, zarozki pedzioł żech sie, że zaś tam cza jechać. Niy jes to może Praha, ale czesko ksiyngarnia na Hlavni trzidzie majóm, a jak majóm, to zaś sie tam jakie bojki (pohadki) kupi.

Łostatnio w Czechach (zdaje sie, że we Brnie) kupił żech sie "Princa Mamanka" Jana Budařa. Budařa może znocie, bo czynsto gro w czeskich filmach, kiere i Poloki w kinach abo w tv puszczajóm. Terozki napisoł udano (i tako do śmjychu) bojka ło ksiyńciu-maminsynku, w kieryj trocha bawi sie klasycznymi mótywami z bojek i baśni, ale móm ta kniga rod, i czekóm na jij ykranizacjo. 

A i licza, że niydugo zasik sie co podobnego z Czeska prziwieza...