Bojki z ulicy Cichyj

Piotr Drzyzga

dodane 2018-08-06 09:33

Chopy, nazot do Europy!

Tydziyń tymu naszkryfloł żech na Wiara.pl (kónretnie tukej) felietón ło ślónskim fusbalu, ale czuja, że tymatu żech niy wyczerpoł. Że jeszcze jedyn, drugi, czeci wóntek musiołbych ruszyć, bo przeca fusbal, chocioż pónoć z Anglie, to jes to wybitnie ślónsko rzecz! Bo tyn región to niy ino gruby, familoki, kołocze i krupnioki, ale tyż Ruch, Górnik, Stadión Ślónski itd. 

Dyć nawet w wydanym niydowno, dwujynzycznym atlasie do bajtlów „Górny Śląsk. Atlas dla dzieci” idzie znalyź info ło Ruchu! Ruchu, kiery jes mi nojbliższy, a kiery łostatnio coroz bardzij mie sztresuje i dołuje. No ja, w sobota wygrali 4:0 ze Skróm Czynstochowa, ale prowda jes tako, że durch sóm w II lidze i kiedy zaś zagrómy na naszym "niybieskim" poziómie (ło miszcza i ło puchary), to ciynżko pedzieć. Coby my ino niy dopadli, jak Polónia Bytóm i jyj kibice, spómnajóncy stare dobre czasy z lot... '50.

Bo tak sie myśla, jak to bydzie, jak mój chrześniok bydzie trocha wjynkszy i usłyszy łod nos (łody mie, abo łod jego dziadka - tyż kibica Niybieskich), ło Ruchu i jego lygyndach.

Wilimowski szczylo sztyry gole Brazylii, Cieślik klupie dwa tory Rusóm, dream-team Vicana jes jednóm z łośmiu nojlepszych drużyn w Europie, a nazwiska chopów co wtedy w Ruchu grały, do dziosioj wypowiado sie na Cichyj tak, choby to były rycyrze Łokróngłego Stołu, jak to kiedyś chyba Wojciech Kuczok napisoł...

Dyć to wszysko brzmi choby bojki!

To samo godoł zresztóm w sobota tryner Ruchu. "My na tym stadionie cały czas chcemy, żyjemy mistrzostawami Polski, pucharami eurpejskimi, fajerwerkami, których dzisiaj nie ma i na tę chwilę ich tutaj nie będzie".

Ciynżko sie z tym wszsykim pogodzić. I tak do kóńca powjym Wóm, że sie niy godza. Bo przeca niydugo grómy puchar Polski. A to ino pora meczów i cyk, cyk, cyk, i nawet z II ligi idzie wlyź do Europy. I tak trocha na to licza.

Marzynie ściyntyj gowy?

Kaj tam...

Idea chopa kiery wierzy w bojki! :)

N P W Ś C P S
30 1 2 3 4 5 6
7 8 9 10 11 12 13
14 16 17 18 19 20
21 22 23 24 25 26 27
28 29 30 31 1 2 3
4 5 6 7 8 9 10
Dzisiaj: 21.10.2018