Dzisioj łostatniy dziyń marca, a jo żech sam jeszcze nic w tym miesióncu na blogu niy napisoł?

No czasym tak to jes, że czowiek niy mo gowy do blogowanio, chocioż pómysły sóm, a i roztómajte bojki tyż sie "polecajóm", coby je poczytać, łobejrzeć i tak dalij...

Na przikłod kapnół żech sie łostatnio, że móm faza na... piratów. Łaziłek ze sioszczynicóm po jednym markecie i jak łona sznupała za kolorowankami z Barbie, abo za bojkami z Minecrafta, jo jaroł żech sie choby gupi ksiónżeckami i malowankami ło piratach.

Skónd mi sie to wziyło? Może z czasów, jak żech bół bajtlym i u ujka na katowickim Dymbie łobejrzoł żech KARMAZYNOWEGO PIRATA. Że to klasyk z Burtym Lancasterym to jedno, ale wtedy (a bół to przełóm lot '80 i '90) ważniyjsze bóło to, że paczołek tyn film na nowym, kolorowym telewizorze "na pilota". 

W dóma mielymy jeszcze starego Rubina (skrzinia na ekranie kieryj wszyskie filmy i bojki wyglóndały na zielóno-żółte - choby jej jakie utopce pod wodóm kryńciły). A u ujka pjyrszy roz widzioł żech kolory żywe i barwy barewne. Wcześnij takie pocztówkowe kadry bóły ino na... pocztówkach, kiere babce posyłała ciotka Brygida z Niymiec. 

Potym bół jeszcze ksiónżkowy pirat Rabarbar, telewizyjno WYSPA SKARBÓW z Charltónym Hestónym, a nawet piracko gra kómputerowo co sie nazywała PIRACY (takie choby żywe szachy), w kiero ciupoł żech na Cómmodore C-64... 

Pod kóniec maja mo dó naszych kin trefić film PIRATY Z KARAIBÓW. ZYMSTA SLAZARA. Niby nigdy niy był żech jakimś wielkim fanym tyj filmowyj, pirackij serii z Jóhnym Deepem, ale wto wjy. Łostatnio czyńś (ta z 2011 roku) podobała mi sie nawet-nawet, a że w tyj nowyj mo wystópmić mo sóm Paul McCartney, to wto wjy. Może sie nawet kopna do kina i te spómniynie z czasów jak paczołek KARMAZYNOWEGO PIRATA zaś łodżyje.

Bo jak wiadómo niy łod dzisioj, sala kinowo to mjyjsce magiczne i roztómajte cuda sie w nij dziejóm :)