Tymczasym w Czechach...

dodane 11:22

Łostatnio na Bojkoblogu za wiela sie niy dzioło, ale wjycie jak to jes.

Ślub, urlop, podróż poślubno... Czowiek mioł inne rzecy na gowie.

No ale terozki jesżech już nazot, a że byłek łostatnio mjyndzy inkszymi w Czechach, to i prziwiózłek sie stamtónd tradycyjne, czeskie... dividiczka :)

Jedne z nich to bojka "Tři bratři". Nakryńcił jóm sóm Jan Sverak - tyn sym, co w latach dziewjyńdziesióntych dostoł Łoscara za film "Kola". Tyn sóm jes tyż scynarzysta, czyli łojciec Jana, Zdynek.

Godo sie, że bojka (zwano w Czechach pohadkóm), to taki ichniyjszy gatunek narodowy. Baśnie, bojki, pohadki... - durch sie je tam pisze, kryńci, nagrywo do radia, na audiobooki i tak dalij. Beztóż byłek ciekawy, jak sie poradzi z nióm taki uznany twórca, jak Jan Sverak. I powjym Wóm, że niy ma źle.

Pozióm tychniczny tyj musicalowyj bojki (bo durch tukej śpjwajóm), naprowdy jes impónujóncy. Zdjyńcia, pyjzaże, kómpozycje...  - wola "Tři bratři" łod disneyowskich "Tajymnic lasa"! Pod tym wzglyndym tyn film zachwyco. Szkoda ino, że niy godo nóm nic nowego.

Bo te tytyłowe czi braciki, żynióm sie - kólejno - ze Śpjóncóm Królewnóm, Czerwónym Kapturkiym i Maruszkóm z bojki ło dwanostu miesióncach. Niby fajnie, ale tak naprowdy to Sveraki, we skrócie, kolejny roz godajóm nóm historie tych bohatyrek, kiere wszyscy dobrze znómy. Może małe bajtle, co tych historek niy znajóm, bydóm miały z tego uciycha, ale dó mie to była trocha tako powtórka z rozrywki.

Co mi po tym filmie łostanie? Myśla, że piosynka Tómasza Klusa, kiero go prómowała i kiero we filmie tyż jes wykorzystano. Bestóż wciepója jóm Wóm póniżyj, a z czeskich nowych filmów bardzij polecóm "Díra u Hanušovic" Krobota abo "Učitelka" Hrebejka. Niy sóm to może bojki, ale - tak po prowdzie - sto razy wjyncyj żech z nich mioł, niż ze sverakowyj, łodgrzywanyj kotlet-pohadki "Tři bratři". Pjyknyj wizualnie, ale mało łoryginalnyj, niystety...

 

nd pn wt śr cz pt sb

26

27

28

29

30

31

1

2

3

4

5

6

7

8

9

10

11

12

13

14

15

16

18

19

20

21

22

23

24

25

26

27

28

29

30

1

2

3

4

5

6

Dzisiaj: 25.06.2019

Polecam

Bądź na bieżąco