Jes tako staro, hiszpańsko lygynda, ło tym jak to św. Franciszek z Asyżu szoł na pielgrzimka do Santiago De Compostela.

Tam trefił syneczka, co sie nazywoł Cotolay i razym z tym małym gizdym, mioł założyć pjyrszy, franciszkański klasztor.

Czy to jes prowda? Żodyn historyk Wóm tego niy powjy. Ale w lygyndzie ta historio żyje do dzisioj. Hiszpany roz jóm nawet sfilmowały, a my mogymy sie terozki tyn film łobejrzeć, bo E-lite Distribution dociepało go na DVD do swoij nowyj ksiónżeczki z kolekcji "Ludzie Boga".

"Cotolay", kierego wyryżysyrowoł José Antonio Nieves Conde, to ciepło i pogodno historka dlo cołkij familie. Akja toczy sie sam mjyndzy Dólinóm Niyba i Dólinóm Piekła. W tyj łokolicy jes tyż pónoć kajś zakopany skarb, ale przede wszyskim jes tytułowy Cotolay - bajtel, co kożdego umi łocyganić i wykolegować (na przikłod opatowi Bynedyktynów robi tyn sóm numer z pociyntóm skóróm, co antyczno Dydóna Numidyjczykóm, jak zakłodała Kartagina).  

"Cotolay. Mały druh Franciszka" to tómik z nowego cyklu "Perły Klasyki Kina Ryligijnego". Bo widzicie, jes to produkcjo z 1966 roku. Ale żeby trónciła myszkóm, to tego niy powjym. Mo raczyj swój urok. Połno tukej "fantazji, humoru i radości wiary", jak pisoł niydowno w "Gościu Niydzielnym" Edward Kabiesz. I jo sie z nim zgodzóm.

*

A do Wos miołek jedyn ygzymplorz "Cotolaya" (ksiónżeczka + film na DVD). Mieliście mi ino napisać kiero z lygynd abo łopowieści ło śwjyntym Franciszku lubicie nojbardzij. Nagroda dostowo:

Danuta Nienałtowska z Czornyj Białostockij

Gratuluja, poślymy jóm jeszcze dzisioj pocztóm.

A terozki łobejrzijcie sie youtube'owy trailer cyklu "Perły Klasyki Kina Ryligijnego"