Puście sie TVP Kultura! Czwortek, dwanosty listopod, godzina 9:25.

Poleci tam "Lygynda Tatrów" - ciykawy film z 1994 roku, w kierym cołkiym fajnie udało sie posplotać ze sobóm roztómajte wóntki z utworów Kazimjyrza Przerwy-Tetmajera.

Ło czym to jes? A ło wszyskim górolskim. To trocha takie scynki ło zbójnikach, niyszczyńśliwie zakochanych, bjydokach abo umrzikach. Cołki czos ale wyłazi sam specyficzno górolsko myntalnoś, no i wiara (i ta ryligijno i ta przesóndowo). Beztóż roz trefjymy sam Matka Bosko Ludźmjyrsko, a roz jakysi dymóny, co to wyglóndajóm trocha choby nasze ślónskie utopce.

Wtoś powjy mydło-pówidło. No niyby ja, ale przeca taki mioł być tyn film łod poczóntku. Mje nojbardzij podobajóm sie tukej te mómynty, w kierych ryalizatory chcóm cosik kóniecznie podkreślić. Abo spłyntować.

Jes sam na przikłod tako scyna, w kieryj aktorka Agniyszka Brzezińsko jes przerażono, że jyj bracik idzie zbójować. Razym z jyj lynkiym narasto tyż coroz głośnij i głośnij muza. Jak potym symbolicznie puści gołymbie, naroz łodezwióm sie fanfary. Smutne, ale potynżne. Co za ykspresja! Co za patos!

Niby to taki knif z gatunku retro, ale to działo. No ja, ale wjycie, kómpozytorym był tukej sóm Wojciech Kilar, beztóż niy ma sie co dziwić, że to tak na widzów wpływo. A i idyalnie łoddowo potyga gór. Niyby czowiek jes w nich maluśki ale (paradoks!) czuje sie tam wżdycki wjynkszy.

Udano jes tyż na przikłod historio skrzipka Bartusia, co jak umar, a potym w niybie zaczół grać górolskie melodie, to już wszyskie anioły i śwjyńci niy chcieli suchać ło żodnyj inkszyj muzyce, jak ino ło górolskij :)

No mo tyn film swój urok. Yfekty szpecjalne niy sóm może za szpecjalne, ale to niy wadzi. Górolski świot filmowce pokozały sam pjyknie. A jak sie wejrzycie na łobsada, to już w ogóle...

Rafał Królikowski, Jerzy Trela, Krzysztof Jasiński, Tomasz Schimscheiner, Jerzy Bińczycki (Pónbócek!), Edward Linde-Lubaszenko (śwjynty Pyjter!).

No to czeba zobejrzeć!